Madridning «Real» klubi bosh murabbiyi Joze Mourinyo «Vilyarreal»ga qarshi uchrashuvdagi voqealar haqida jurnalistlarning savollariga javob berishni istamadi.

«Real» Vinisius Junior maydondan chetlatilgan bahsda «Vilyarreal»ni 1:0 hisobida mag‘lub etgan edi. Ushbu o‘yindan so‘ng Mourinyo matbuot anjumanida ishtirok etmadi.

Seshanba kuni o‘tkazilgan matbuot anjumanida esa portugaliyalik mutaxassis mazkur uchrashuv haqida batafsil gapirishdan bosh tortdi.

— Shanba kunigi o‘yin haqida nima deya olasiz?

— Hech narsa, mutlaqo hech narsa. Oldimizda Chempionlar ligasi o‘yini turibdi. Chempionatdagi uchrashuv haqida aytadigan gapim yo‘q.

— O‘sha vaziyatdan g‘azablandingizmi?

— Hozirgina hamkasbingizga bu mavzuni izohlashni istamasligimni aytdim. Umid qilamanki, bu shu mazmundagi oxirgi savol bo‘ladi.

Sizga «Vilyarreal»ga qarshi o‘yinning faqat birinchi daqiqasini tomosha qilishni taklif etaman. Agar xohlasangiz, buni shanba kuni muhokama qilamiz.

Futbolni tushunadigan odam uchun birinchi daqiqani ko‘rishning o‘zi yetarli, — deya Mourinyoning so‘zlarini keltirmoqda AS.

«Real» 14 oktyabr, chorshanba kuni UEFA Chempionlar ligasi doirasida safarda «Roma»ga qarshi maydonga tushadi.