«Barselona» va Londonning «Chelsi» klublari yozgi transferlar davrida ekvadorlik iqtidorli hujumchi Xuan Rikelme Anguloni o‘z safiga qo‘shib olishga yaqin kelgani ma’lum bo‘ldi.
Radio Diblu jurnalisti Andres Ponsening xabar berishicha, Yevropaning ikki yirik klubi ham transfer oynasining so‘nggi kuniga qadar 18 yoshli futbolchini sotib olish uchun kurash olib borgan.
Biroq yakunda Angulo Ekvadorning «Independyente del Valye» klubidan Angliyaning «Sanderlend» jamoasiga o‘tishni afzal ko‘rgan.
«Barselona» va «Chelsi»ning rejasi
Manbaning ma’lum qilishicha, kataloniyaliklar ham, londonliklar ham yosh hujumchini o‘z safiga qo‘shib olgan taqdirda, uni o‘yin amaliyotiga ega bo‘lishi uchun boshqa klubga ijaraga berishni rejalashtirgan.
Biroq «Sanderlend» bosh murabbiyi Rejis Le Bri futbolchiga jamoada muhim o‘rin ajratilishini va’da qilib, uni Angliya klubini tanlashga ko‘ndirgan.
Aynan shu omil Anguloning yakuniy qaroriga ta’sir ko‘rsatgani aytilmoqda.
Angulo yangi jamoasida debyut qildi
18 yoshli ekvadorlik futbolchi o‘tgan hafta «Sanderlend» safidagi ilk rasmiy uchrashuvini o‘tkazdi.
U «Brayton»ga qarshi g‘alaba bilan yakunlangan bahsda zaxiradan maydonga tushib, yangi klubida debyut qildi.
Shu tariqa, Angulo Yevropaning ikki yirik klubi qiziqishiga qaramay, muntazam o‘yin amaliyotiga ega bo‘lish imkoniyatini ustuvor deb bilib, faoliyatini «Sanderlend»da davom ettirishga qaror qilgan.
