«Барселона» ва Лондоннинг «Челси» клублари ёзги трансферлар даврида эквадорлик иқтидорли ҳужумчи Хуан Рикельме Ангулони ўз сафига қўшиб олишга яқин келгани маълум бўлди.

Radio Diblu журналисти Андрес Понсeнинг хабар беришича, Европанинг икки йирик клуби ҳам трансфер ойнасининг сўнгги кунига қадар 18 ёшли футболчини сотиб олиш учун кураш олиб борган.

Бироқ якунда Ангуло Эквадорнинг «Индепендьенте дель Валье» клубидан Англиянинг «Сандерленд» жамоасига ўтишни афзал кўрган.

«Барселона» ва «Челси»нинг режаси

Манбанинг маълум қилишича, каталонияликлар ҳам, лондонликлар ҳам ёш ҳужумчини ўз сафига қўшиб олган тақдирда, уни ўйин амалиётига эга бўлиши учун бошқа клубга ижарага беришни режалаштирган.

Бироқ «Сандерленд» бош мураббийи Режис Ле Бри футболчига жамоада муҳим ўрин ажратилишини ваъда қилиб, уни Англия клубини танлашга кўндирган.

Айнан шу омил Ангулонинг якуний қарорига таъсир кўрсатгани айтилмоқда.

Ангуло янги жамоасида дебют қилди

18 ёшли эквадорлик футболчи ўтган ҳафта «Сандерленд» сафидаги илк расмий учрашувини ўтказди.

У «Брайтон»га қарши ғалаба билан якунланган баҳсда захирадан майдонга тушиб, янги клубида дебют қилди.

Шу тариқа, Ангуло Европанинг икки йирик клуби қизиқишига қарамай, мунтазам ўйин амалиётига эга бўлиш имкониятини устувор деб билиб, фаолиятини «Сандерленд»да давом эттиришга қарор қилган.