Dortmundning «Borussiya» klubi 17 yoshli qanot hujumchisi Matis Albert anchadan buyon Londonning «Chelsi» klubi qiziqishlari doirasida bo‘lib kelmoqda. Bu haqda insayder Ekrem Konur ijtimoiy tarmoqlarda xabar berdi.
Manba ma’lumotiga ko‘ra, «Chelsi» hali yanvar oyidayoq futbolchini o‘z safiga qo‘shib olishni istagan, biroq Germaniya klubi uni jamoada saqlab qolishga qaror qilgan. Qayd etilishicha, Albertning transferi faqat kelasi yozda, futbolchi 18 yoshga to‘lganidan keyin amalga oshishi mumkin.
Amerikalik futbolchining Dortmund klubi bilan amaldagi shartnomasi 2027 yilning iyun oyi oxirida o‘z nihoyasiga yetadi. Transfermarkt portali mutaxassislari uning bozor qiymatini 5 million yevroga baholamoqda.
