O‘zbekiston Superligasining 24-turidan o‘rin olgan “Dinamo” va “Buxoro” jamoalari o‘rtasidagi uchrashuv mehmonlarning 2:1 hisobidagi g‘alabasi bilan yakunlandi. Samarqandliklar uchrashuvning 17-daqiqasidan boshlab bir kishi kam bo‘lib harakat qilishganiga qaramay, 90-daqiqaga qadar durangni saqlab turishdi. Biroq so‘nggi daqiqalarda belgilangan penalti “Dinamo”ning mag‘lubiyatiga sabab bo‘ldi.

Uchrashuv mezbonlarning faol harakatlari bilan boshlandi. 2-daqiqada Abdurahmonovning uzatmasidan keyin Anvarjon Hojimirzayev xavfli vaziyatga chiqishi mumkin edi, biroq to‘pga yetib bora olmadi.

Oradan to‘rt daqiqa o‘tib esa “Dinamo” hisobni ochdi. 6-daqiqada Anvarjon Hojimirzayev raqib darvozasini ishg‘ol qilib, jamoasini oldinga olib chiqdi — 1:0. Bu uning joriy mavsum Superligadagi 10-goli bo‘ldi.

8-daqiqada Firdavsning zarbasi darvoza ustuniga tegdi. Qaytib kelgan to‘pni Hojimirzayev darvozaga yo‘llay olmadi va samarqandliklar hisobdagi farqni oshirish imkoniyatini boy berishdi.

Biroq 17-daqiqada uchrashuvning borishi keskin o‘zgardi. Bosh hakam Asker Najafialiyev VAR yordamida vaziyatni ko‘rib chiqqach, Nurullo To‘xtasinovni maydondan chetlatdi. Natijada “Dinamo” o‘yinning katta qismini bir kishi kam bo‘lib o‘tkazishga majbur bo‘ldi.

Son jihatdan ustunlikka ega bo‘lgan “Buxoro” ketma-ket hujumlar uyushtirdi. Biroq “Dinamo” darvozaboni Nemanov bir necha bor ishonchli harakat qilib, jamoasini gollardan saqlab qoldi. Mezbonlar esa qarshi hujumlar orqali raqib darvozasiga tahdid solishda davom etishdi. Birinchi bo‘limga qo‘shib berilgan to‘rt daqiqada ham hisob o‘zgarmadi.

Ikkinchi bo‘limni ham “Dinamo” hujumlar bilan boshladi. 47-daqiqada Amonovning zarbasi noaniq ketdi, 49-daqiqada esa Firdavsning zarbasini raqib darvozaboni qaytardi. 57-daqiqada Mamasidiqovda gol urish uchun ajoyib imkoniyat yuzaga keldi, ammo u vaziyatdan foydalana olmadi.

Shunga qaramay, maydonda bir kishi kam bo‘lib harakat qilayotgan “Dinamo” hisobdagi ustunligini saqlab qolishga urindi. 60-daqiqada Abdurahmonov o‘rniga jarohatidan tiklanib qaytgan Sanjar Qodirqulov maydonga tushdi.

65-daqiqada esa “Buxoro” hisobni tenglashtirdi. Asadbek Jo‘raboyev raqib darvozasini ishg‘ol qilib, uchrashuvga yangi nafas bag‘ishladi — 1:1.

Keyingi daqiqalarda har ikki jamoa g‘alaba golini urish uchun harakat qildi. 70-daqiqada Nemanov yana bir muhim seyvni amalga oshirdi. 77-daqiqada Amonovda yaxshi imkoniyat bo‘ldi, ammo mezbonlar undan foydalana olishmadi.

Uchrashuv yakuniga yaqin “Dinamo” uchun yana bir og‘ir vaziyat yuzaga keldi. 85-daqiqada bosh hakam samarqandliklar darvozasi tomon penalti belgiladi. Vaziyat VAR orqali qayta ko‘rib chiqilishi mumkin bo‘lgan bo‘lsa-da, hakam monitor oldiga bormadi.

90-daqiqada Nika Kacharava penaltini aniq amalga oshirib, “Buxoro”ni hisobda oldinga olib chiqdi — 1:2.

Ikkinchi bo‘limga qo‘shib berilgan olti daqiqa davomida “Dinamo” hisobni tenglashtirishga urindi, ammo bu harakatlar samara bermadi. Shu tariqa, samarqandliklar hisobda oldinda borib, maydonda bir kishi kam bo‘lib qolganiga qaramay, so‘nggi daqiqalarda mag‘lubiyatga uchrashdi.

“Dinamo” — “Buxoro” — 1:2
Gollar: Anvarjon Hojimirzayev (6) — Asadbek Jo‘raboyev (65), Nika Kacharava (90, penalti).
Chetlatish: Nurullo To‘xtasinov (17, "Dinamo").