Ўзбекистон Суперлигасининг 24-туридан ўрин олган “Динамо” ва “Бухоро” жамоалари ўртасидаги учрашув меҳмонларнинг 2:1 ҳисобидаги ғалабаси билан якунланди. Самарқандликлар учрашувнинг 17-дақиқасидан бошлаб бир киши кам бўлиб ҳаракат қилишганига қарамай, 90-дақиқага қадар дурангни сақлаб туришди. Бироқ сўнгги дақиқаларда белгиланган пенальти “Динамо”нинг мағлубиятига сабаб бўлди.

Учрашув мезбонларнинг фаол ҳаракатлари билан бошланди. 2-дақиқада Абдураҳмоновнинг узатмасидан кейин Анваржон Ҳожимирзаев хавфли вазиятга чиқиши мумкин эди, бироқ тўпга етиб бора олмади.

Орадан тўрт дақиқа ўтиб эса “Динамо” ҳисобни очди. 6-дақиқада Анваржон Ҳожимирзаев рақиб дарвозасини ишғол қилиб, жамоасини олдинга олиб чиқди — 1:0. Бу унинг жорий мавсум Суперлигадаги 10-голи бўлди.

8-дақиқада Фирдавснинг зарбаси дарвоза устунига тегди. Қайтиб келган тўпни Ҳожимирзаев дарвозага йўллай олмади ва самарқандликлар ҳисобдаги фарқни ошириш имкониятини бой беришди.

Бироқ 17-дақиқада учрашувнинг бориши кескин ўзгарди. Бош ҳакам Аскер Нажафиалиев ВАР ёрдамида вазиятни кўриб чиққач, Нурулло Тўхтасиновни майдондан четлатди. Натижада “Динамо” ўйиннинг катта қисмини бир киши кам бўлиб ўтказишга мажбур бўлди.

Сон жиҳатдан устунликка эга бўлган “Бухоро” кетма-кет ҳужумлар уюштирди. Бироқ “Динамо” дарвозабони Неманов бир неча бор ишончли ҳаракат қилиб, жамоасини голлардан сақлаб қолди. Мезбонлар эса қарши ҳужумлар орқали рақиб дарвозасига таҳдид солишда давом этишди. Биринчи бўлимга қўшиб берилган тўрт дақиқада ҳам ҳисоб ўзгармади.

Иккинчи бўлимни ҳам “Динамо” ҳужумлар билан бошлади. 47-дақиқада Амоновнинг зарбаси ноаниқ кетди, 49-дақиқада эса Фирдавснинг зарбасини рақиб дарвозабони қайтарди. 57-дақиқада Мамасидиқовда гол уриш учун ажойиб имконият юзага келди, аммо у вазиятдан фойдалана олмади.

Шунга қарамай, майдонда бир киши кам бўлиб ҳаракат қилаётган “Динамо” ҳисобдаги устунлигини сақлаб қолишга уринди. 60-дақиқада Абдураҳмонов ўрнига жароҳатидан тикланиб қайтган Санжар Қодирқулов майдонга тушди.

65-дақиқада эса “Бухоро” ҳисобни тенглаштирди. Асадбек Жўрабоев рақиб дарвозасини ишғол қилиб, учрашувга янги нафас бағишлади — 1:1.

Кейинги дақиқаларда ҳар икки жамоа ғалаба голини уриш учун ҳаракат қилди. 70-дақиқада Неманов яна бир муҳим сейвни амалга оширди. 77-дақиқада Амоновда яхши имконият бўлди, аммо мезбонлар ундан фойдалана олишмади.

Учрашув якунига яқин “Динамо” учун яна бир оғир вазият юзага келди. 85-дақиқада бош ҳакам самарқандликлар дарвозаси томон пенальти белгилади. Вазият ВАР орқали қайта кўриб чиқилиши мумкин бўлган бўлса-да, ҳакам монитор олдига бормади.

90-дақиқада Ника Качарава пенальтини аниқ амалга ошириб, “Бухоро”ни ҳисобда олдинга олиб чиқди — 1:2.

Иккинчи бўлимга қўшиб берилган олти дақиқа давомида “Динамо” ҳисобни тенглаштиришга уринди, аммо бу ҳаракатлар самара бермади. Шу тариқа, самарқандликлар ҳисобда олдинда бориб, майдонда бир киши кам бўлиб қолганига қарамай, сўнгги дақиқаларда мағлубиятга учрашди.

“Динамо” — “Бухоро” — 1:2
Голлар: Анваржон Ҳожимирзаев (6) — Асадбек Жўрабоев (65), Ника Качарава (90, пенальти).
Четлатиш: Нурулло Тўхтасинов (17, "Динамо").