Тошкентнинг «Обод» футбол клуби Олий лигадаги фаолиятини давом эттириши сўроқ остида турибди.

Дастлаб клуб Украинадан ҳомий топгани, улар «Обод»ни молиялаштириб бориши ҳақида хабарлар чиқди. Айни пайтда «Обод»ни 2-давра ўйинларига украиналик бош мураббий Андрей Демченко тайёрламоқда. Мутахассис 1976 йилда таваллуд топган. У Россия ва Украина фуқаролигига эга.

Демченко ўз вақтида «ЦСКА», «Аякс», «Металлург-З» «Иличевец», «Оболон», «Дачия», «Гелиос» каби клубларда тўп сурган. Мураббий сифатида Запарожьенинг «Имекс» клубида иш бошлаган. 2012 йил «Металлург-З» клубида ишлаган, кейинги икки йил шу клуб ўринбосарларини шуғуллантирган.

Бироқ, таниқли журналист Алишер Никимбаев хабарига кўра, «Обод» 4-5та инвестор билан музокара ўтказган. Уларнинг барчаси муваффақиятсиз якунланган. Жамоа эса иккинчи даврани бошламаслиги мумкин.

Эслатиб ўтамиз, «Обод» Олий лигадаги навбатдаги ўйинини 5 август куни Наманганнинг «Навбаҳор» клубига қарши ўтказиши лозим. Яна бир муаммо шундаки, жамоа ўзининг уй учрашувларини «Жар» стадионида ўтказиб келаётганди. Бироқ, кейинроқ ўзининг уй аренаси реконструкция қилинаётган «Пахтакор» «Жар»ни ижарага олди. Шундан кейин «Обод» қайси стадионда ўйинларини ўтказиши ҳозирча маълум эмас.