Toshkentning «Obod» futbol klubi Oliy ligadagi faoliyatini davom ettirishi so‘roq ostida turibdi.

Dastlab klub Ukrainadan homiy topgani, ular «Obod»ni moliyalashtirib borishi haqida xabarlar chiqdi. Ayni paytda «Obod»ni 2-davra o‘yinlariga ukrainalik bosh murabbiy Andrey Demchenko tayyorlamoqda. Mutaxassis 1976 yilda tavallud topgan. U Rossiya va Ukraina fuqaroligiga ega.

Demchenko o‘z vaqtida «SSKA», «Ayaks», «Metallurg-Z» «Ilicheves», «Obolon», «Dachiya», «Gelios» kabi klublarda to‘p surgan. Murabbiy sifatida Zaparojyening «Imeks» klubida ish boshlagan. 2012 yil «Metallurg-Z» klubida ishlagan, keyingi ikki yil shu klub o‘rinbosarlarini shug‘ullantirgan.

Biroq, taniqli jurnalist Alisher Nikimbayev xabariga ko‘ra, «Obod» 4-5ta investor bilan muzokara o‘tkazgan. Ularning barchasi muvaffaqiyatsiz yakunlangan. Jamoa esa ikkinchi davrani boshlamasligi mumkin.

Eslatib o‘tamiz, «Obod» Oliy ligadagi navbatdagi o‘yinini 5 avgust kuni Namanganning «Navbahor» klubiga qarshi o‘tkazishi lozim. Yana bir muammo shundaki, jamoa o‘zining uy uchrashuvlarini «Jar» stadionida o‘tkazib kelayotgandi. Biroq, keyinroq o‘zining uy arenasi rekonstruksiya qilinayotgan «Paxtakor» «Jar»ni ijaraga oldi. Shundan keyin «Obod» qaysi stadionda o‘yinlarini o‘tkazishi hozircha ma’lum emas.