“Нефтчи” – “Шўртан” баҳсидан сўнг Мурод Исмоилов матбуот анжуманида иштирок этди. Марғилонлик мутахассис ўйин ҳақида шундай деди:

— “Шўртан”га қарши жиддий тайёргарлик кўргандик. Биринчи бўлимда йигитларда ҳаяжон бўлди. Иккинчи таймда голли вазиятлар содир этдик. Рўзимбой Аҳмедов гол урди. Бироқ унинг голи инобатга олинмади. Голни албатта такрор кўриб чиқамиз. Мен йигитларга ўз жарима майдонимиз яқинида эҳтиёт бўлиб ўйнаш керак эканлигини, рақибга жарима тўпларини ишлаб бермасликни кўп айтиб ўтгандим. Афсуски, битта мана шу вазият кўп нарсани ҳал қилди.

Иккинчи бўлимда “Нефтчи” кўрсатган ўйин мени ҳам руҳлантирди. Ҳақиқий жанговор руҳият майдонда ҳукм сурди. Бугун майдоннинг ҳолати ҳам бизга халал берди. Ҳали кўрасиз, бу йигитлар сифатли майдонларда ўзини ижобий маънода бошқачароқ тутади. Мавсумга тайёргарлик кўрганимиз иккинчи ва учинчи турларда кўринади. Бу босқичга келиб, йигитлар ўзларининг энг яхши формасига кириб олади.

— “Нефтчи”нинг бугунги дарвозабони Евгений Черемисиндан кўпчилик норози бўлди...
— Ҳар бир мухлиснинг ўз фикри бор. Биз Евгенийни ўйинларидан қониқиш ҳосил қиляпмиз. Мен кўп айтганман, бу дарвозабонни клубга қабул қилаётганда унинг инсоний фазилатларини биринчи ўринга қўйганман. Бугун биринчи ўйин бўлгани учун Черемисин ҳам ҳамма қатори ҳаяжонланди. Бироқ кўплаб вазиятларда у ўз ишини яхши бажарди.

— Бахтиёр Ёқубов нима учун асосий таркибда майдонга чиқмади?
— Бахтиёрни жароҳати бор эди. Айни пайтда у тикланиш жараёнида бўлгани учун уни захирадан майдонга туширдим. У 90 дақиқага тайёр эмас эди.

— Мурод ака, Камрон Кападзе бугун асосий таркибда майдонга чиқди. Бироқ унинг ўйини қовушмади...
— Камрон ёш ўйинчи. Олимпия терма жамоасига кетган йигитларнинг ўрнини Кападзе билан тўлдирдик. Ҳозир унинг жойида ўйнайдиган бошқа вариант йўқ эди. Бугун нафақат Камронда, балки ёши катта ва тажрибли ўйинчиларда ҳам ҳаяжон бўлди.

Ҳожиакбар Жабборов, “Рухсор” ТРК (Фарғона)