Бугундан пляж футболи бўйича Ўзбекистон терма жамоаси БААнинг Дубай шаҳрида ўқув-машғулот йиғинини бошлайди. Терма жамоамиз делегацияси Time Grand Plaza Hotel меҳмонхонасида жойлашган. Бош мураббий Аҳад Юсупов шогирдлари учун ушбу йиғин пляж футболи бўйича Осиё чемпионатига тайёргарлик вазифасини ўтаб беради.

21 мартга қадар давом этадиган йиғин доирасида БААнинг “Аш-Шабоб”, “Ал-Аҳли” ҳамда Кувайт терма жамоасига қарши ўртоқлик учрашувлари ўтказилади. Йиғинни якунлаб, терма жамоа делегацияси 22 март куни Қатар пойтахти Доҳа шаҳрига йўл олади.

Ўзбекистон терма жамоасининг Осиё чемпионатида қатнашадиган якуний таркиби қуйидагича:

Дарвозабонлар: Акмал Ҳазратқулов, Ғанишер Холмуродов.
Ўйинчилар: Тохир Абдураззоқов, Феруз Фахриддинов, Сарвар Шоаҳмедов, Фарҳод Мираҳмедов, Фурқат Азизов, Фарҳод Жумаев, Сарвар Холмуродов, Жаъфар Ирисметов, Жамол Шарипов.

Йиғиндан сўнг таркибда ўзгариш бўлиши мумкин. Доҳа шаҳри 23-28 март кунлари бўлиб ўтадиган пляж футболи бўйича Осиё чемпионатига мезбонлик қилади. Минтақанинг 15 та энг яхши жамоаси Осиё чемпионатида иштирок этиш орқали шу йили 9-19 июль кунлари Португалияда бўлиб ўтадиган пляж футболи бўйича Жаҳон чемпионатига ажратилган 3 та йўлланма учун курашади.

Ўзбекистон терма жамоаси “C” гуруҳида БАА, Фаластин ҳамда Ироқ терма жамоаларига қарши қумга тушади. Юсупов шогирдлари 23 март куни Фаластин, 24 мартда БАА, 25 март санасида Ироқ терма жамоаси билан муносабатларига ойдиндик киритиб олишади.