Бугундан бошлаб Жанубий Корея терма жамоаси аъзолари Пажу шаҳридаги терма жамоа базасига бирма-бир кириб келишни бошлашди. Жанубий Кореянинг «Бест Элевен» нашри терма жамоа сардори Ки Сонг Йонгдан Ўзбекистон билан ўйин ҳақидаги фикрлари билан қизиқди.

Корейс нашри «Суонси»да тўп сурадиган сардоримиз Ўзбекистон билан ўйинга «пичоғини қайраяпти», дея уни кўкларга кўтариб мақтаган.

«Биз Ўзбекистон терма жамоаси билан Осиё кубогида тўқнашганлигимиздан барча хабардор. Ўша ўйинда 90 дақиқа ичида ғалаба қозона олмаганлигимизни ўйласам кайфиятим тушади. Буни унутиш осон эмас. Агар тайёргарликни меъёрига етказмасак, бу сафар ҳам бизга осон бўлмаслиги тайин. Осиё кубогидаги ўйинда йўл қўйилган камчиликларни бартараф этиб, 90 дақиқа давомида яхши ўйин ўтказишни истаймиз. Бу сафар осонлик билан хушкайфият бағишлайдиган ғалабани қўлга киритиш ниятидамиз», — деди Англия премиер-лигасида тўп сурадиган Ки Сонг Йонг. У давом этаркан: «2018 йилги Жаҳон чемпионати мен учун охиргисими? Билмадим, 2018 йили мен 30 ёшда бўламан ва терма жамоадаги жой осонлик билан эгалланади деб ўйламайман. Ҳозир ҳам шундай ўйлайман. Терма жамоанинг ҳар бир ўйинига масъулият билан қарашга одатланганман. Аввало, ЖЧ саралаш босқичини муваффақиятли тугатиб олиш ҳақида фикрлашимиз лозим», - деди.

Отабек Йўлдошев
Жанубий Корея, Сеул