Мезбонларнинг минимал ҳисобдаги ғалабаси (2:1) билан якунланган навбатдаги «Эль-класико» хусусида Мадрид ва Каталония матбуотида деярли бир хил фикрлар билдирилди. Азалий рақибларнинг бу қадар якдиллиги камдан-кам кузатиладиган ҳолат.

Marca (Мадрид): «Ҳаммасини арзимас деталлар ҳал қилди. «Реал» чемпионлик пойгасидан чиқиб кетди».

- Қониқарли ўйин, қониқарсиз натижа. «Реал» ўта нурсиз ўйин кўрсатган, лекин рақибидан кўра самаралироқ ўйнаган «Барса»га имкониятни бой берди. Меҳмонлар майдон эгаларини учрашувда сезилмай қолишга мажбур этишди. Бироқ мезбонлар биринчи хавфли ҳужумни голга айлантирдилар. 31-дақиқада Бензема рақиб ҳимоячиларини ажойиб тарзда алдаб, «сеҳрли» товони ёрдамида Роналдуни Бравога қарши яккама-якка вазиятга чиқарди. «Реал» танаффусга қадар яна гол уришга ҳақли эди. Матеу Лаос Криштианунинг «офсайд»да эканлиги туфайли Бэйлнинг голини инобатга олмади. Уэльслик ҳужумчи яна ўзини кўрсатиши мумкин эди. Бироқ ўта қулай вазиятдан фойдалана олмади. Танаффусдан сўнг «Реал» ҳужумкор ҳаракатларини, мезбонлар эса мудрашни давом эттирдилар. Нав­батдаги голга ҳам арзимас жиҳат - Луис Суарес томонидан амалга оширилган битта-ю-битта ҳужум сабаб бўлди.  Секин-аста «класико»даги кескинлик ортиб борди, рақиб узатаётган тўпларни илиб олиш, хатоликлар кўпайди. Кейинчалик «Барса» меҳмонларни тўпсиз қолдирди. Неймар 3та  қулай вазиятлардан фойдалана олмади. Ўйинда умуман кўринмай қолган Мессида ҳам имконият бўлди. Муҳим 3 очко «Камп-Ноу»да қолди. «Реал» ғолибликка даъвогарлар сафидан чиқиб кетдими?

AS (Мадрид): «Жамоалар ҳеч қачон бунчалик ўхшаш бўлмагандилар»

- «Барселона» ўз услубини ўзгартира олиш қобилиятини намойиш этди. Тўпни назорат қилиш орқали амалга ошириладиган гипноз ҳақида гапирмаса ҳам бўлаверади. Футбол тобора вертикал тус олмоқда. Жамоаларни ажратиб турадиган фарқ қолмади, улар ҳеч қачон ҳозиргидек ўхшаш бўлмаган эдилар. Натижа шуни кўрсатдики, бу ўхшашликдан мезбонлар кўпроқ самара олишди. Ҳар ҳолда, «Камп Ноу»даги сўнгги қарама-қаршилик натижаси шундай.

«Реал» мазкур учрашувга шундай «сценарий» ёздики, у ўйин тугаши билан унутилди. Карло Анчелотти шогирдлари биринчи бўлимнинг сўнгги 15 дақиқасида рақибни ўз жарима майдончасига қамаб қўйишди. Аммо иккинчи бўлимда мезбонлар айнан шу вазиятни такрорладилар. Фақат тақдир тақозоси билангина «Барса» учинчи (ҳатто тўртинчисини ҳам) тўпни дарвозага киритолмади. Албатта, бу «Реал»га нисбатан ўта шаф­қатсизлик бўларди - бусиз ҳам қимматли очколардан жудо бўлган клуб ўз нуфузини сақлаб қолди. Аммо чемпионлик унвони яна 1 қадамга узоқлашди.

El Mundo (Мадрид): «Криштиану жафокаш образидан чиқа бошлади».

- Луис Суареснинг «Барселона»си ўз услубини тубдан ўзгартирди. Майдон эгаларини узоқ вақт бошқа ўйин билан машғул бўлишга мажбур эта оладиган жамоа «Ноу Камп»­га ҳар куни келавермайди. Жафокаш образидан чиқа бошлаган Роналду учун мазкур беллашув кўнгилдагидек кечди. Футболчининг чеҳрасида нафрат аломатлари сезилмади. Аксинча, дарвозани ишғол этганидан сўнг умумий муваффақиятни нишонлаш мақсадида ўз жамоадошларини ёнига чорлади. Биринчи бўлимнинг сўнгги дақиқаларида «Барса»ни исканжадан чиқариб юбориш билан «Реал» катта хатоликка йўл қўйди. Ҳисоб 2:1 кўринишини олгач, меҳмонлар рақибнинг қарши ҳужумларини бартараф этиш билан овора бўлишди.

Sport (Барселона): «Меҳмонлар қайнаётган қозонни совутишга муваффақ бўлдилар»

- Бугунгидек «класико»га аввал ҳеч қачон гувоҳ бўлмагандик. У Dragon Khan (Барселонадаги Порт-Авентура кўнгилочар боғига ўрнатилган аттракцион)ни эслатарди. Натижа ҳал қилувчи аҳамиятга эга бўлган баҳсда «Барса» ҳам, «Реал» ҳам бутун ўйин давомида ўз салоҳи­я­т­­ларини тўлиқ ишга сола олмадилар. Азалий рақиб ҳисобланган жа­моа­лар кутилмаганда бир-бирларига яқинлашиб олдилар. Таркиблар фақат ноёб иқтидор соҳибларидан иборат, ярим ҳимоячилар тўпни моҳирона олиб юрадилар, очиқ ҳудудлардан унумли фойдаланишни билишади. Айниқса, ҳужум чизиқларига эътирозлар йўқ. Мазкур «дуэл»­да ғолиб бўлмади. Тўп гоҳ у, гоҳ бу томонга йўналтирилиб, бирон-бир вазиятни баҳолашга имкон бермади. Рақиб майдонига таркибда муаммолар билан етиб келган «Реал» илк марта хотиржам ва эркин ҳаракат қилди. Шу тариқа меҳмонлар қозондек қайнаётган стадионни сўндиришга муваффақ бўлишди. «Барселона»нинг иккинчи голидан кейин баҳс ўзаро тўқнашувлар, хатоликлар, майдоннинг барча нуқталаридаги микро дуэлларга айланди. Томонлар биринчи навбатда рақибга ўз ўйинини топиб олиш имкониятини бермаслик хусусида бош қотиришди. Фақат Серхио Бускетс билан Хави майдонга тушганларидан кейин Луис Энрике шогирдлари тўп назоратини ўз қўлларига олишди. Натижада ҳисобни янада йириклаштириш имкониятига эга бўлишди. Чемпионат якунланишига 10та тур қолганида «Барселона» «Қироллик клуби»дан 4 очкога илгарилаб кетди. «Реал» ЕЧЛда ғолиб чиқиш учун қандай усулдан фойдаланган бўлса, айнан шу усул ёрдамида таслим этилди. У ўз услубининг қурбонига айланди. Луис Энрике мавсумнинг ҳал қилувчи босқичида муайян вазиятга мослашиш бобида ажойиб маҳоратини намойиш этди.

El Mundo Deportivo (Барселона): «Бу «Реал»ни ёмон ўйин билан енгиб бўлмайди»

- Бу клуб фахрланишга арзийди. У ўз мухлисларини даҳшатли қуролларга соғинтириб қўймайди. Уларни стандарт вазиятлардан фойдаланишда (Матьёнинг голи) ёки тезкор қарши ҳужумда (Суареснинг голи)  мириқиб томоша қилиш мумкин. Бундан ташқари, жамоамиз «иккинчи қават»да аввалгидек заиф эмас. «Қаймоқранглилар» биринчи бўлимда ажойиб ўйин намойиш этишди, «анорранглилар» эса иккинчи бўлимда. Лекин ҳаргиз «Реал» ўз рақибидан кучли эди, дея кўрманг. Тамом, голга тортадиган вазиятлардан хабардорман. Ҳамма гап улардан фойдаланишда. Браво ажойиб «сэйв»­ларни намойиш этиб, ўз вазифасини аъло даражада уддалади. Бироқ Касильяс ҳам шу юмушларни бажарди. «Барса» бутун ўйин давомида рақибидан тетикроқ кўринди, ҳужумларнинг якуний босқичида самаралироқ ҳаракат қилди. Ана шу ижобий хислатлар бизга Ла-лиганинг пешқадами, «Қироллик кубоги»нинг финалигача ҳамда ЕЧЛнинг чорак финалчиси бўлган клубни тортиқ этди. Биз «Реал»дан 4 очкога илгарилаб кетдик. Бу жамоани ёмон ўйин билан енгиб бўлмайди.

La Vanguardia (Барселона): «Барса» ирода ва жисмоний жиҳатларда кучлироқ эди»

- Ақлдан оздирувчи «Эль-класико»да ҳар 2 томон ҳам ғалабага ҳақли эди. Майдонда нафақат футбол, балки эҳтирослар баҳси ҳам кечди. Майдоннинг барча ҳудуди хавотирга чулғанганди. Аксинча, барча голлар рақиб кучлироқ ўйин кўрсатаётган паллаларда амалга оширилди. Бу галги қарама-қаршиликнинг фарқли жиҳати шундаки, унда Месси-Роналду рақобатига гувоҳ бўлмадик. Бу сафар мураббийларнинг тактик қарорлари ҳал қилувчи роль ўйнади. Рақиб ҳужумларини бартараф этиш ҳамда ўз жамоасининг тезкор қарши ҳужумларини ташкил этишда ажойиб маҳорат соҳиби бўлган Бускетснинг майдонда йўқлиги муҳим аҳамият касб этди. Луис Энрике ташаббусни рақибга берган ҳолда асосий эътиборни қарши ҳужумларга қаратди. Унинг шогирдлари эса ирода ва жисмоний тайёргарлик бобида рақибдан устунроқ эканликларини исботлашди.

ҚизиҚарли фактлар

1 - Луис Суарес - 1960 йилдан бу ёғига (55 йил аввал Рамон Альберто Вильяверде гол урганди) «Эль-класико»да гол урган дастлабки уругвайлик ҳужумчи.

2 - Қаторасига 2та сафар учрашувини «Реал» бундан аввал 2012 йилнинг сентябрида бой берганди.

7 - «Барселона» таркибида турли мусобақаларда 7 марта майдонга тушган Суарес шунча гол урган.

15 - Криштиану Роналдунинг «Барселона»га урган голлари сони. «Классико»да фақат Месси (21) ва Альфредо Ди Стефано (18) ундан яхшироқ кўрсаткични қайд этишган.

16 - Криштиану Роналду, Карим Бензема ва Гарет Бэйлларнинг 2015 йилдаги умумий голлари сони. Таққослаш учун келтирадиган бўлсак, Месси ана шу даврда 17та гол урган!

18 - «Эль-класико»нинг шунча беллашувида ўз дарвозалари дахлсизлигини таъминлаш «Реал»га ҳам, «Барса»га ҳам насиб этмаган.

22 - Мессининг «Барса» таркибида жорий мавсумда амалга оширган самарали тўп узатишлари сони.

30 - Мессининг «Реал»га қарши ўйинлари сони. Бу баҳсларда Лео 21 гол урган ва 13 марта ассистентликни амалга оширган.

42 - «Эль-класико»да шунча марта майдонга тушган Хави Маноло Санчис ва Пако Хенто рекордини такрорлади.

150 - Мессининг «Барса» сафидаги барча самарали тўп узатишлари сони. Уларнинг 109таси Ла-лига беллашувларида амалга оширилган.