Донецкнинг “Шахтёр” футбол клубида тўп сурувчи бразилиялик ярим ҳимоячи Лукас Фернандо Киевга кўчиб ўтганидан кейин ярим йил ичида ўзининг иккинчи жипидан айрилиб қолди, деб хабар бермоқда Украинанинг “Вести” телеканали.
2014 йилнинг сентябрида жамоа Чемпионлар лигаси ўйинини ўтказиш учун Львовга кетганида Фернандога тегишли қора рангли Land Rover жипи ўғирлаб кетилганди. Ўтган душанба куни эса унинг 2014 йилда ишлаб чиқарилган оқ рангдаги Range Rover автомобили ҳам ўғирлаб кетилди.
“Афсуски, уни топишга имконлар жуда кам”, деб айтилмоқда Украина ИИВ матбуот хизматида.
Ўғирлаб кетилган автомобилнинг нархи 150 минг долларни ташкил қилиши айтилмоқда.













