"Манчестер Юнайтед" Англия Премьер-лигаси турнир жадвалида кучли учликдан жой олишга жуда яқин турибди.

Жума куни ҳозирда учинчи поғонани эгаллаб турган "Астон Вилла" сафарда чемпионат аутсайдери — "Вулверхэмптон"га имкониятни бой берди (0:2). Шу тариқа, агар "қизил иблислар" якшанба куни ўз майдонида "Кристал Пэлас"ни мағлуб этса, бирмингемликларни ортда қолдириб, учинчи ўринга кўтарилиб олади.

Айни дамда Майкл Кэррик жамоаси ҳисобида 27 та ўйиндан сўнг 48 очко бор. "Астон Вилла" эса 28 та учрашувда 51 балл жамғарган. Тўплар нисбати бўйича манкунианликлар аллақачон рақибидан устунлик қилмоқда (+11 га қарши +8).

Таъкидлаш жоизки, Кэррик тайинланганидан бери "МЮ" мумкин бўлган 18 очкодан 16 тасини қўлга киритди — бешта ғалаба ва бир дуранг.