Фарғона шаҳридаги яқинда қуриб битказилан “Истиқлол” стадионида илк учрашув бўлиб ўтди.
Майда старт оладиган Жаҳон Чемпионатига тайёргарлик кўраётган Ўзбекистон U20 терма жамоаси ушбу мундиал мезбонига қарши ушбу янги стадионнинг очилиш учрашувида майдонга тушди. Ўйин олдидан ўйингоҳ очилишига бағишланган концерт дастури ташкил қилинди.
“Истиқлол” ўриндиқлари мухлислар билан тўлди ва ҳамма ёшларимизни баралла қўллаб-қувватлаб турди. Футболчиларимиз ҳам мухлислар ишончини оқлаш мақсадида ўйин аввалиданоқ ташаббусни ўз томонларига оғдириб олиб, тезкор гол киритишга ҳаракат қилди. Бу мақсадга эришилди ҳам.
Учрашувнинг 12-дақиқасида жамоа сардори Жавоҳир Собиров жарима майдончаси ичидан йўлланган кучли зарбаси билан ҳисобни очди.
Гарчи кўплаб вазиятлар юзага келган бўлса-да, ҳар икки жамоа имкониятлардан фойдаланишни уддалай олмади ва танаффусга ушбу ҳисоб билан чиқиб кетди.
Иккинчи бўлим ҳам шиддат борасида биринчисидан асло қолишмади. Равшан Ҳайдаров шогирдлари ҳимояда анча тартибли ўйин намойиш этди. Ҳужумларни якунлашда эса кўп ҳам омад кулавермади. Ҳатто 88-дақиқада Янги Зеландия дарвозаси томон белгиланган 11 метрлик жарима зарбаси ҳам голга айланмай қолди. Зарбани Ўринбоев йўллаган эди. Аммо рақибларимиз дарвозабони Оливер Саил унинг зарбасини бартараф эта олди. Натижада эса 12-дақиқада киритилган гол ўйинда ягоналигини сақлаб қолди.
Ўртоқлик ўйини
ЎЗБЕКИСТОН U20 - ЯНГИ ЗЕЛАНДИЯ U20 - 1:0
Гол: Жавоҳир Соҳибов (12)
Ноаниқ пенальти: Забиҳилло Ўринбоев (88, дарвозабон)
Ўзбекистон U20: 12.Дилшод Ҳамроев, 4.Миржамол Қосимов (2.Рустам Ашурматов, 61), 5.Одил Ҳамробеков, 6.Акромжон Комилов, 8.Жавоҳир Соҳибов, 9.Элдор Шомуродов, 10.Отабек Шукуров, 17.Достон Ҳамдамов (16.Сардор Азимов, 76), 19.Забиҳилло Ўринбоев, 20.Достон Турсунов, 23.Хуршид Ғиёсов (22.Жавоҳир Сидиқов, 86).
Янги Зеландия U20: 1.Оливер Саил, 2.Брок Мессенжер, 4.Жесси Эдж, 5.Адам Митчелл, 7.Эндрю Блэйк (18.Ноа Биллингслей, 77), 9.Жудд Бэйкер (10.Клайтон Льюис, 59), 13.Кори Браун (3.Деклан Уайн, 84), 14.Андре Де Йонг (19.Николас Дел 77), 15.Алекс Руфиер, 16.Те Вихонги (8.Мосес Дайер, 64), 17.Мэтью Ридентон.
