Тошкент, 9 апрель - Кеча "Локомотив" Осиё чемпионлар лигасининг 4-турида "Ал Садд"га қарши майдонга тушиб, йирик 5:0 ҳисобида ғалаба қозонди.

Қўлга киритилган ғалабадан сўнг "темирйўлчилар" тўрт очко билан учинчи ўринга кўтарилиб олишди. Энди жамоамиз 21 апрель куни "Ал Ҳилол" билан куч синашади.

Унгача эса олий лигада тур ўйинлари бўлиб ўтади. Хусусан олдинда бизни "Бунёдкор"га қарши кечадиган баҳс кутиб турибди. Олий лиганинг 4-туридан ўрин олган "Локомотив" - "Бунёдкор" беллашуви 13 апрелда (душанба) бўлиб ўтади. Ўйиннинг бошланиш вақти - 16:00. Бир кун олдин ўтказиладиган ёшлар лигаси баҳси ТТЙМИ стадионида ташкил этилади. Ўринбосарлар учрашуви соат 15:00да старт олади, деб хабар беради клуб расмий сайти.

"Локомотив" ўринбосарлари аллақачон бўлажак ўйинга тайёргарликни бошлаб юборишган. Асосий таркиб эса эртага йиғилади ва яна машғулотларга киришади. Тошкент дербиси номини олган "Локомотив" - "Бунёдкор" баҳсини ФИФА рефериси Равшан Эрматов бошқаради. Унга қанотларда Жаҳонгир Саидов билан Абдулҳамид Расулов ёрдам беришади.