“Навбаҳор” – “Сўғдиёна” жамоалари ўртасидаги учрашув якунлангач ҳар икки жамоа мураббийлари ўртасида матбуот анжумани бўлиб ўтди. Биринчи бўлиб "Сўғдиёна" бош мураббийи Даврон Файзиев саволларга жавоб берди.

Даврон Файзиев (“Сўғдиёна” жамоаси бош мураббийи): - Ўйин ҳақида нима дейиш мумкин. Авваламбор “Навбаҳор” жамоасини чемпионатдаги биринчи ғалаба билан табриклайман. Ҳар доимгидек худди “Навбаҳор” жамоасига керак бўлгани каби бизга ҳам меҳмонда очко олиш муҳим эди. Лекин, мақсадимизга эриша олмадик. Бу футбол, яъни ҳаёт давом этади. Мағлубиятни ҳам тан олиш керак. Бугун майдонда уч дўстнинг ўзаро баҳси кечди дейиш мумкин. Барчага маълумки, Бахтиёр Ашурматов ва Улуғбек Бақоевлар билан дўстмиз. Улар майдонга икки киши бўлишгани боис ғалабани тантана қилишди. Бир сўз билан айтганда майдонда жанговор футбол бўлди. Биз бугун мазмунли тарзда ҳаракат қилиб, мухлисларни хурсанд қилдик.

Ўйинни голга қадар давом этишини билардик. Агарда биринчи бўлимдаги имкониятдан фойдаланганимизда балки ғалабани қўлга киритган бўлармидик. Умуман олганда учрашув қизиқарли ва мухлисларга ёқадиган бўлди деган бўлардим. “Навбаҳор” жамоаси ишқибозларнинг қўллаб-қувватлаши туфайли уч очкони қўлга киритди дейиш мумкин. Айнан маҳаллий мухлисларнинг далдаси ҳимояда хато қилишимизга олиб келди деб ўйлайман. Қолаверса, қўллаб-қувватлаш футболчиларимизни ҳаёжонланишига сабабчи бўлди. Шу сабабли, футболчиларимизга ҳеч қандай эътирозим йўқ. Эндиликда, ишлашда ва хатоларни бартараф этишга ҳаракат қиламиз.