27 апрель куни жамоамиз олий лиганинг 6-турида "Локомотив" меҳмони бўлади.

Турнинг марказий учрашуви бўлиши кутилаётган учрашув кескин ва муросасиз ўтишига шубҳа йўқ. Ўтган мавсумда чемпионлик учун кураш шу жамоалар ўртасида кечганди. 2015 йилда ҳам ҳар икки клуб ҳозирча олий лигада мағлубиятсиз одимлашмоқда.

Жума куни эрталаб Эрондан қайтиб келган футболчиларимиз кеча кечки машғулотни "Пахтакор" стадионида ўтказишди. Кахи Махарадзе энди енгил машқларга киришган бўлса, Жамшид Искандеров ҳозирча машғулотларга қайтгани йўқ.

Олий лига тарихида жамоалар 20 марта тўқнаш келишган. 14 учрашувда "Пахтакор", 1 бор "Локомотив" зафар қучган. 5 ўйинда дуранг қайд этилган. Жамоамиз 51, "темирйўлчилар" 16 тўп киритган. Рақиб майдонидаги 10 учрашувнинг 7тасида "Пахтакор" устун келган бўлса, 3 беллашувда кучлар тенг келган.

Ёшлар таркиблари баҳси 26 апрель, якшанба куни ТТЙМИ стадионида соат 16:30да бошланади. Асосий жамоалар ўйини 27 апрель, душанба куни соат 17:00да "Локомотив" стадионида старт олади.

Ўйинни Равшан Эрматов бошчилигидаги ҳакамлар гуруҳи бошқариб боради.

Турнинг марказий ўйини саналган Тошкент дербисида жамоамиз ишқибозларини футболчиларни қўллаб-қувватлашга чақириб қоламиз.

"ЛОКОМОТИВ" – "ПАХТАКОР"

Ҳакамлар: Равшан Эрматов (Тошкент), Абдуҳамидилло Расулов (Тошкент), Жаҳонгир Саидов (Тошкент), Аҳрол Рисқуллаев (Тошкент).

Назоратчи: Арслон Ҳотамов (Тошкент).

ЎзПФЛ вакили: Ф. Магометов.