Футбол пайдо бўлибдики, унда гол урган ўйинчи албатта, хурсандчилигини бошқалар билан баҳам кўришни истайди. Масалан, кимдир зарбаси аниқ чиққач, голини ўз мураббийига бағишлаб, унинг олқишини олади. Яна кимдир уни аниқ «пас» билан таъминлаган шеригига, бошқалар эса стадиондаги мухлисларга миннатдорчилик билдиради. Биз қуйида ҳикоя қилмоқчи бўлган футболчилар голни кутилмаган инсонларга бахшида қилишни исташган.
Промеснинг ҳайдовчиси
Квинси Промес Саранскда дам олиш кунларини ажойиб ўтказди. Яъни, голландиялик бу истеъдод соҳиби ўтган шанба куни «Мордовия» дарвозасини икки марта аниқ нишонга олиб, «қизил-оқлар»нинг омадсизликлардан иборат нохуш анъанасига чек қўйди ва «чемпионат»нинг махсус совринига эга бўлди. Энг қизиғи, футболчи ўзининг иккинчи голини жамоасига бағишлади. Биринчисини-чи, деб ўйлаяпсизми?! Биринчи голини Промес ўз ҳайдовчисига бағишлабди. Чунки, ўша куни футболчининг Олег исмли ҳайдовчиси туғилган кунини нишонлаган экан.
Рунининг «нокаути»
«Манчестер Юнайтед»нинг яқинда «Тоттенхэм»га қарши ўтказган ўйини кўпчиликнинг ёдида қолди. Аслида бу учрашув ҳам тезда унутилиб кетиши мумкин эди. Аммо «қизил иблислар» етакчиси Уэйн Руни голини шунчалик кутилмаган ва антиқа тарзда нишонладики, буни ҳеч ким кутмаганди. Ўша вазиятда у худди боксчилардек ҳавога 3-4 марта «зарба» берди-ю, ерга қулади. Шу ўйиндан бир неча кун олдин эса Руни «Сток Сити» ҳимоячиси Филлип Бардсли билан бокс тушиб, ростдан ҳам нокаутга учраган эди. Эътиборлиси, мазкур қилиқ жуда кўп қизиқарли муҳокамаларга сабаб бўлгач, Руни бундай ишни қайтиб такрорламасликка сўз берган. Унинг айтишича, ўғилчаси мактабда худди отаси каби ҳавони муштлаб юрганмиш. Бу эса табиийки, атрофдагиларга зарар етказиши мумкин.
Флоренци ва Мауриларнинг бувиси
«Рома»нинг «Кальяри» дарвозасига киритилган иккинчи голидан кейин бутун Италия Алессандро Флоренцининг бувиси ҳақида билиб олди. Зеро, голга муллифлик қилган бу футболчи қувончи ичига сиғмай, шартта трибуналарга қараб югурди ва ўзини олдинги қаторлардан бирида ўтирган бувисининг қучоғига отди. «Стадио Олимпико» эса бундан жуда тўлқинланиб кетди. Аммо ўйиндаги расмий шахс ҳисобланган бош ҳакам бағритошроқ чиқиб қолиб, футболчини ўзбошимчалик учун сариқ карточка билан жазолади. Ҳакамнинг бу қаттиққўллиги яқинда «Парма» ҳужумчиси Хосе Маурига анча таъсир қилди, чоғи. Негаки, у «Ювентус»га қарши ўтган сенсацияли ўйинда гол ургач, уни бувисига бағишлади-ю, аммо трибунага чопишдан ўзини тийди. Шунчаки, ўйин тугагач, фикрларини ОАВда эълон қилиб қўя қолди: «Менга куч-қувват берган Яратганга шукур! Бу голни бувижонимга бағишлайман! Голим тарихда қолишига сира ишона олмаяпман».
Яхши биласизки, айни пайтда сотувга қўйилган ва сўнгги поғонада бораётган «Парма» ўша ўйинда «Юве»ни мағлубиятга учратиб қўйганди.
Дзюбанинг аёли ва
синглиси
Бундай ноодатий рейтингни Артём Дзюбасиз тузиб бўлармиди?! 26 ёшни қарши олган «Ростов» ҳужумчиси шунчалик кўп воқеаларни бошидан ўтказдики, бунақаси фақат спортчи ҳаётида учраши мумкин, холос. Биз уларга батафсил тўхталмайликда, яхшиси, «Урал» дарвозасига урган голидан кейинги кичик интервьюсини эътиборингизга ҳавола қилайлик: «Охирги вақтларда ишларим унчалик юришмаётгани учун бу голнинг қадри жуда баланд десам, янглишмайман. Мен бу голимни ҳамма вақт каминани қўллаб-қувватлаб, далда бўлиб турган турмуш ўртоғимга бағишлайман. Бизда ҳаммаси яхши бўлишини истайман ва бунга астойдил ҳаракат қиламан», - деди Дзюба клуб матбуот хизматига.
Айтганча, Дзюба мавсум аввалида синглисини ҳам бир ёдга олганди. Ўшанда у «Спартак» шарафини ҳимоя қилар, бу клуб билан «Уфа»га қарши ўйинда «дубл»га эришганди. Ўйин якунига етгач, Артём қуйидаги сўзларни айтган: «Бугун менда бошқача кун - синглим турмушга чиқмоқда. Икки голим ва ғалабани унга бағишлайман».
Тевеснинг ўҒли
«Ювентус»нинг аргентиналик ҳужумчиси Карлос Тевес «Милан»га қарши ўтган ўта муҳим ўйинда рақиб дарвозасини ишғол қилгач, кийимининг аллақаерига яшириб қўйилган болалар сўрғичини олди-да, уни камерага қараганча сўра кетди. Албатта, бу орқали футболчи яқиндагина дунёга келган ўғлини эслади. Эҳтимол, бу иш чақалоқни хурсанд қилиб, у отаси иштирокидаги ўйинларни янада кучли қизиқиш билан кузата бошлар?... Хуллас, сўрғичли кап-катта одамни футболдан бошқа яна қаерда ҳам учратиш мумкин?!
Марселонинг жияни
Мадриднинг «Реал» клуби ҳимоячиси Марсело голлари билан ҳар доим ҳам кўзга ташланавермайди. Аммо шундай вазият яралиб қолса, ундан оқилона фойдаланади. Жумладан, ЕЧЛ нимчорак финалида «Шальке» дарвозасини ажойиб тарзда ишғол қилгач, Марсело ОАВга таъсирли интервью берди: «Чемпионлар Лигасида ҳамма нарса бўлиши мумкин. Биз ҳар қандай ҳолатда ҳам рақибни енгиш учун етарлича ҳушёр бўлишимиз лозим. Ҳа, ҳозирча уйдаги ўйин олдидан икки тўпли ажойиб устунликка эгамиз, аммо ҳали ҳеч нарса ҳал бўлгани йўқ. Мен бугунги голимни яқиндагина туғилган жиянимга бағишлайман, аммо гол туфайли юзага келган хурсандчиликни барча жамоадошларим билан бўлишмоқчиман. Ахир, «Реал» - мен учун каттакон бир аҳил оила».
Рамоснинг онаси
«Қироллик клуби» аъзолари ва уларнинг ноодатий қарорлари ҳақидаги мавзуни Серхио Рамос давом эттиради. Рамос ўтган йилнинг ноябрида фаолиятидаги голлари сонини 50тага етказгач, бу кичик юбилейни онасига бағишлашини маълум қилди: ««Реал» учун 50та гол уриш - катта шараф. Мен бу қимматли голимни онажонимга бағишлайман. Зеро, бу кунни узоқ вақтдан бери интизорлик билан кутгандим».
Жароҳатланган
жамоадошлар
Футбол ва жароҳатлар - бир-биридан ажралмас тушунчалар. Тўқнашувлар ва нотўғри ҳаракат туфайли футболчининг яна аввалги даражасига чиқиб олиши учун ҳафталар, ойлар ва ҳаттоки, йиллар зарур бўлиши ҳеч кимга сир эмас. Бундай вақтларда жароҳатланган ўйинчининг тезроқ сафга қайтишида унинг жамоадошлари ҳам катта ўрин тутишади. Яъни, майдондагилар гол уришса ёки жамоа ғалаба қозонса, муваффақиятни кўпинча ўз шерикларига бағишлашади. Жумладан, Николас Парехо ҳам «Сельта» дарвозаси ишғол қилингач, ўз голини Себастьян Кристофоро (уругвайлик футболчи тиззасини операция қилиниши туфайли олти-етти ойга сафдан чиққан)га бағишлади.
Шунингдек, жамоавий бирдамлик Римнинг «Рома» клубида ҳам тез-тез кузатилади. Масалан, клубнинг етакчи футболчиларидан бири бўлган Кевин Стротман жароҳат олиб, узоқ муддат тўшакка михланиб колгач, Франческо Тотти ва унинг шериклари ҳар бир голдан сўнг телекамераларга Стротманга тегишли футболкани кўз-кўз қилишмоқда.
Максимовнинг Қизчаси
Мақола охирларида биз қайғулироқ воқеаларни эслашга қарор қилдик. Тўғри, аслини олганда, бундай воқеаларни қувноқ ҳикоялар қаторига киритиш унчалик тўғри бўлмайди, аммо улар эътиборга арзийди.
Хуллас, март ойининг сўнгги кунларида «Анжи» ярим ҳимоячиси Илья Максимов оғир мусибатга учради: унинг эндигина 3 ёшни қаршилаган қизчаси бевақт келган ажал туфайли оламдан кўз юмди. Бу хабар тарқалиши билан клуб расмий сайтида қуйидаги таъзиянома пайдо бўлди: «Қадрли Илья! Биламизки, бундай вақтда инсонга ҳеч қандай тасалли ёрдам бера олмайди. Биз фақат сенга қуйидагиларнигина айта оламиз: биз сени яхши кўрамиз ва бошингга тушган кулфатингга шерикмиз. Шунингдек, Анечкани яхши кўрган ҳар бир одамга ҳамдардлик билдирамиз. Биз доим сизлар биланмиз!».
Албатта, бундай айрилиқдан кейин яна фаол турмуш тарзига қайтиш осонликча рўй бермайди. Аммо Максимов буни уддалаб, клуби олдидаги бурчини адо этишга ўзида куч топа олди. Яъни, у қизининг вафотидан бир неча кун ўтиб, «Химик»ка қарши ўйинда қатнашибгина қолмай, жамоасининг иккинчи голига муаллифлик қилди. Голдан сўнг Максимов кўзида ёш билан телекамераларга футболкасига туширилган қизининг катта сурати ва унинг остидаги ёзувни кўрсатди. Унда «Сен доим менинг юрагимдасан!» деб ёзилганди.
Жуниор Маланда
«Вольфсбург» футболчиси Жуниора Маланданинг оламдан ўтиши билан тугаган автоҳалокат нафақат клуб (айтишларича, воқеадан сўнг жамоадаги ўйинчилар махсус руҳшунос ёрдамида кўрикдан ўтказилган) ва бундеслигани, балки бутун дунёни қайғуга солди. Иқтидорли футболчининг бу ёруғ олам билан хайршлашганини майдонда биринчилардан бўлиб Ромелу Лукаку ёдга олди. У Англия Лига кубогининг 1|32 финал босқичидан ўрин олган «Вест Хэм»га қарши ўйинда гол ургач, қўлларини осмонга чўзиб, уни дўстига бағишлаганига ишора қилди. Кейинчалик маълум бўлишича, ҳар иккала футболчи ёшлик пайтларида Брюсселдаги бир туманда истиқомат қилишган, уларнинг оналари эса яқин дугона бўлишган экан.
Исроил РАҲИМОВ тайёрлади.
Манба: ИнтерСПОРТ газетаси
