«Барселона» бош мураббийи Луис Энрике "Бавария"га қарши ўйиндан кейин ўз фикрларини билдириб ўтди.

«Албатта, ўйин осон бўлмади. Яхшиямки, биринчи ўйинда катта фарқ билан ғалаба қозонгандик. "Бавария" ҳисобда олдинга чиқиб олганида бизга осон бўлмади. Лекин биз ўз вақтида мувозанатни тиклаб олдик. Танаффусгача эса ҳисобда олдинга ўтиб олдик. Иккинчи бўлимда эса барчаси бошқача бўлди, рақиб кўпроқ ҳужум қилди.

Биз финалга чиқдик. Энди бизда барча 3та мусобақада ғолиб чиқиш имконияти бор. Ҳа, мюнхенликлар таваккал қилишди ва бизга босим ўтказишди, аммо бизнинг маҳоратли футболчилар қандай ҳаракат қилишни билишади. Футболчиларимнинг ҳаракатларидан қониқиш ҳосил қилдим. Уларни табриклайман. "Барселона"нинг бир қисми бўлиш нима эканини ҳис қиляпман.

Биз ўйин бошидан вазиятлар яратиб, тезкор гол уришни истагандик. Бу бизга ишонч берди. Биринчи бўлимда ўйинни назорат қилдик, иккинчисида эса кўп хато қилдик. Шунга қарамай, бугун оқшомдан хурсанд бўлишимиз керак. Футболчилик фаолиятим ёрқин кечган бўлса-да, мураббий сифатида финалда иштирок этиш — бутунлай бошқача тажриба», – дейди Энрике.