Тожикистонлик мураббий Виталий Левченко Ўзбекистон терма жамоасининг 2026 йилги жаҳон чемпионати гуруҳ босқичида Конго ДРга қарши ўйини ҳақида ўз фикрлари билан ўртоқлашди.

— Конго ДРга қарши баҳсда ғалабани сақлаб қолиш мумкинмиди? Бунинг учун нима қилиш керак эди? Иккинчи бўлимда жамоага нима бўлди?

— Ҳа, ғалабали ҳисобни сақлаб қолиш мумкин эди. Бунинг учун жамоа бироз орқароққа чекиниши, юқори прессингдан воз кечиши ва ўйин суръатини яхшироқ назорат қилиши лозим эди. Бундай вазиятларда суръатни пасайтириш, танаффуслардан унумли фойдаланиш ва зарурат туғилганда тактик қоидабузарликлар қилишни билиш керак.

Иккинчи бўлимда жамоа ҳам жисмоний, ҳам руҳий жиҳатдан пасайиб кетди. Шу билан бирга, мураббийлар штаби майдондаги вазиятга ўз вақтида муносабат билдиролмади. Амалга оширилган алмаштиришлар ўйин схемасини мустаҳкамламади ва жамоага учрашув назоратини қайтаришга ёрдам бермади. Бу эса жамоада амалда муқобил режа — «Б режа» мавжуд бўлмаганини кўрсатади, — деди Левченко.

Эслатиб ўтамиз, ЖЧ-2026 гуруҳ босқичининг учинчи турида Ўзбекистон терма жамоаси Конго ДРга қарши баҳсда 1:0 ҳисобида олдинда бораётганига қарамай, якунда 1:3 ҳисобида мағлуб бўлган эди. Конголиклар гуруҳда учинчи ўринни эгаллаб, плей-оффга чиққан ва 1/16 финалда Англияга 1:2 ҳисобида имкониятни бой берган.