27 май куни (эртага) Польша пойтахти - Варшава шаҳридаги «Миллий» стадионида Европа Лигаси-2015 финал учрашуви бўлиб ўтади. Унда Украинанинг «Днепр» ҳамда Испаниянинг «Севилья» жамоалари ўзаро рўбарў келишади. Мазкур финал УЕФА кубоги тарихидаги 44-ҳал қилувчи баҳс­дир (ЕЛ ташкил этилганидан кейинги 6-финал). Биласиз, турнир ғолиби ЕЧЛда ғалаба қозонган жамоа («Барселона» ёки «Ювентус») билан УЕФА суперкубоги учун кураш олиб боради. Бундан ташқари, ғолиб жамоа навбатдаги ЧЛ гуруҳ босқичига тўғридан-тўғри йўлланма олади.

УЕФА ижроқўми ЕЛ-2015 финалининг Варшавада ўтишини 2013 йилнинг 23 май куни тасдиқлаганди. Кейинги йилнинг 29 августида эса ўйиннинг расмий логопити эълон қилинди ва финал элчиси сифатида Польша терма жамоаси собиқ дарвозабони Ежи Дудек танланди.

Жорий йилнинг 28 апрелида кубокнинг Варшавага топшириш маросими ўтказилди. Примас саройида ташкиллаштирилган тадбирда Польша футбол иттифоқи президенти Збигнев Бонек, Варшава раҳбари Ханна Гронкевич-Вальц, ўтган йили кубок эгасига айланган «Севилья» (Испания) вакиллари  иштирок этишди.

Ҳал қилувчи ўйинга чиқарилган чипталар 26 февралдан 25 мартга қадар УЕФАнинг махсус портали орқали сотилди. Улар 4та тоифада ва нархи ўзига яраша хилма-хил. Яъни 40, 65, 90 ва 130 евролик чипталар сотувга қўйилди.

27 май (чоршанба), соат 23:45
«Днепр» (Днепропетровск, Украина) - «Севилья» (Севилья, Испания)
Варшава. «Миллий» стадиони
Бош ҳакам:  Мартин Аткинсон (Англия)