ФИФАнинг собиқ вице-президенти Жек Уорнернинг ўғиллари АҚШ футбол федерациясининг собиқ ижрочи вице-президенти Чай Блейзер қатори коррупция бўйича терговга ёрдам беришган. Бу ҳақда The Wall Street Journal нашри манбалардан олган расиий ҳужжатлар ва маълумотларга иқтибос келтирган ҳолда хабар бермоқда.
2013 йилда Федерал қидирувлар бюроси ФИФА вице-президенти ва Кариб футбол иттифоқи (КФИ)нинг раҳбари Жек Уорнер фаолияти билан боғлиқ коррупцион жанжал бўйича фаол равишда тергов ҳаракатларини бошлагани маълум қилинганди. ФҚБ ўз терговини Жек Уорнернинг ўғли Дэриан Уорнер гувоҳ сифатида тергов билан ҳамкорлик қилишга рози бўлганидан кейин фаоллаштириб юборган. КФИ ФИФА ижроия қўмитасининг собиқ аъзоси Чак Блейзернинг оффшор ҳисоб рақамига 500 минг доллар ўтказган бир қатор битимлар ФҚБ шубҳаси остига тушган.
Нашрнинг таъкидлашича, Уорнернинг ўғиллари Дэриан ва Дэрилл Блейзер каби ҳукумат билан ҳамкорлик қилган. Улар терговга 27 майда ФИФА амалдорларига айбловлар қўйишга ёрдам берган маълумотларни тақдим қилишган. 2013 йилда ака-ука Уорнерлар яширин тарзда ўзларини айбдор деб тан олганлар, хусусан Дэриан 2006 ва 2010 йилги жаҳон чемпионатларига билетларни ноқонуний тарзда қайта пуллагани, Дэрилл эса ипотека товламачилигида иштирок этганини тан олган.
Маълумотларга кўра, Блейзер ҳукумат билан терговнинг биринчи кунлариданоқ, яъни 2011 йилдан ҳамкорлик қилиб келган. Хусусан, у терговчиларга КОНКАКАФдаги товламачиликлар ва амалдорлар 2010 йилги жаҳон чемпионати учун эҳтимолий овозларни сотиш ва бизнес-битимлар билан боғлиқ ҳолда тўловлар олганлари ҳақидаги маълумотларни тақдим қилган.
Аввалроқ Жек Уорнер даволанаётган шифохонасидан қамоққа олиб келингани маълум қилинганди. У ўтган кечани қамоқда ўтказган, чунки Тринидад ва Тобаго олий суди унинг 2,5 млн доллар гаров эвазига қамоқдан чиқарилишига рухсат бермади.
