Германия ҳамда Ўзбекистон ёшлар терма жамоалари ўртасидаги учрашувдан сўнг бўлиб ўтган матбуот анжуманида Ўзбекистон U-20 ёшлар терма жамоаси бош мураббийи Равшан Ҳайдаров иштирок этди ва ўйин ҳақида фикрларини билдирди.

“Биз бугун кучли рақибга мағлуб бўлдик. Рақиб кучидан келиб чиқиб ҳимояда эҳтиёткорлик билан ҳаракат қилиш ва қарши ҳужум тактикасидан фойдаланишга ҳаракат қилдик. Биринчи бўлимда футболчилар ёмон ҳаракат қилишмади, аммо яна жарима тўпидан гол ўтказиб юбордик. Умуман олганда, биринчи бўлимда Германия терма жамоасида деярли имконият бўлмади”, - дейди Ҳайдаров.

“Иккинчи бўлимга мағлуб бўлиб турган ҳолатда майдонга тушдик. Ҳимояда эҳтиёткор ўйин намойиш этишимиз керак эди, аммо яна ҳимояда кички хатоларга йўл қўйдик”, - дея қўшимча қилди Ўзбекистон ёшлар терма жамоаси бош мураббийи.

“Гуруҳда айни дамда вазият шундайки, иккинчи ўрин учун кураш сўнгги турда ҳал бўлади. Имкониятимиз бор экан, сўнггигача курашамиз”, - дейди Ҳайдаров.