Австралиянинг Мельбурн шаҳрида таэквондо ВТФ бўйича нуфузли турнир давом этмоқда. Рио-2016 Олимпиадасига рейтинг очколари ўйналаётган мусобақада терма жамоамизнинг уч нафар аъзосининг иштирок этаётгани ҳақида хабар берган эдик.
Мусобақанинг илк куни даянга чиққан жаҳон чемпиони Дмитрий Шокин барча рақибларини мағлубиятга учратиб олтин медал ва 20 рейтинг очкосини қўлга киритган эди.
Ҳозиргина яна бир ҳамюртимиз жаҳон вице-чемпиони, дунё рейтингида 1-ўринни эгаллаб турган Жасур Бойқўзиев -87 кг вазн тоифасида кумуш медалга сазовор бўлди. Жасур ҳал қилувчи финал баҳсида хитойлик Жао Ёнгга имкониятни бой бериб қўйди.
Учинчи спортчимиз Умида Абдуллаева эса илк баҳсидаёқ рақибасига ютқазиб қўйди.
Маълумот ўрнида шуни айтиш керак, ўтган йили ўтказилган ушбу мусобақада Никита Рафалович ғолиблик шохсупасига кўтарилган эди. Дмитрий Шокин кумуш, Жасур Бойқўзиев эса бронза медалига сазовор бўлганди.
