Чили терма жамоаси ўз майдонлари бўлиб ўтган Америка кубоги мусобақасида ғолибликни қўлга киритди. Улар финалда Аргентина термасини пенальтилар сериясида мағлуб этиб, бош совринни бошлари узра баланд кўтаришди.

Чилиликлар юлдузли таркибга эга бўлган Аргентинага қарши баҳсни анча фаол ўтказишди. Айниқса, улар ўйин бошида катта иштиёқ билан ҳаракат қилишди. Биринчи бўлим ўрталарида Анхель Ди Мария кутилмаганда жароҳат олиб, майдонни тарк этиши Мартино жамоаси ўйинига таъсирини ўтказмай қолмади.

120 дақиқа давом этган ўйинда ҳимоячилар ва дарвозабонлар яхши ҳаракат қилишди. Чили футболчилари Мессини яхши ёпа олишди. Леонинг финтлари бу сафар иш бермади.

Пенальтилар сериясига яхши тайёргарлик кўрган Чили рақибни доғда қолдирди. Аргентиналиклардан Месси ўз зарбасини голга айлантирган бўлса, Игуаин ўта ноаниқ зарба берди. Банеганинг зарбасини Клаудио Браво қайтарди. Мезбонларнинг барча тўрт нафар футболчилари тўпни дарвозага аниқ жойлашди.

Натижада Чили ўз тарихида илк марта Копа Американи қўлга киритди. Жамоа 2017 йили Россияда бўлиб ўтадиган Конфедерациялар кубогида иштирок этиш ҳуқуқига эга бўлди.

Америка кубоги, финал
ЧИЛИ - АРГЕНТИНА - 0:0
Чили – Браво, Босежур, Исла, Видаль, Вальдивия (Фернандес, 75), Медель, Арангис, Сильва, Варгас (Энрикес, 95), Санчес, Диас.
Аргентина – Ромеро, Рохо, Отаменди, Демичелис, Сабалета, Биглия, Маскерано, Пасторе (Банега, 81), Ди Мария (Лавесси, 29), Агуэро (Игуаин, 74), Месси.
Пенальтилар серияси: 1:0, 1:1, 2:1, 3:1, 4:1.
Огоҳлантиришлар: Сильва (24), Медель (34), Диас (44), Рохо (55), Маскерано (55), Арангис (86), Банега (91).