Аргентина терма жамоаси бош мураббийи Херардо Мартино Чилига қарши бўлиб ўтган Америка кубоги финал баҳсидан кейин ўз фикрлари билан ўртоқлашди.

«Биз ўзимизга хос бўлган ўйинни намойиш қила олмадик. Жамоалар бир-бирларини хавфсизлантира олишди. Биз ҳам, рақиб ҳам кўп вазият ярата олмадик. Шу боис, Аргентина терма жамоаси нима учун ўзининг ўйинини кўрсата олмади деган саволни фақат бизга эмас, Чилига ҳам бериш керак.

Биз уларнинг ярим ҳимоя чизиғини, Вальдивия ва Санчесни назорат қилдик. Мен Чили терма жамоасига юқори баҳо бераман, лекин бугун Аргентина ғалаба қозониши керак эди. Яна ўйнашга тўғри келганда ҳам ўйинимизда ҳеч нарсани ўзгартирмаган бўлардим.

Шунга қарамай, бизга олдинга интилишда давом этамиз. Бу ўйинчилар билан охиригача боришга тайёрмиз. Улар ўйинга тўла кучларини беришмоқда. Улар ҳозир жуда тушкунликка тушишган», – дейди Мартино.