“Бунёдкор” – “Шўртан” учрашувидан кейин ташкил этилган матбуот анжуманининг биринчи қисмида ғузорликлар устози иштирок этди.
Мухтор ҚУРБОНОВ (“Шўртан” бош мураббийи): - “Бунёдкор” учрашувда тўлиқ устунликка эга бўлиб, ҳақли ғалабага эришди. Жамоамиз сўнгги ўйинларда жуда ҳам суст иштирок этмоқда. “Локомотив”дан учралган йирик ҳисобдаги мағлубиятдан кейин руҳан синиб қолдик. Яна бошқа муаммоларимиз нималардан иборат эканлигини таҳлил қилиб чиқамиз. Темур Жўраевни кўпчилик яхши билади. 2002 йилда мен “Пахтакор”да тўп тепиб юрганимда Жўраевни жамоага олиб келишганди. Узоқ йиллардан бери катта футбол ҳавосидан нафас олиб келади. Бироқ уни гуллаган даври 2007 йилларда қолиб кетган экан. Темурни ўзига яраша муаммолари чиқиб туради. “Шўртан”га олиб келиб хато қилганимизни тушуниб етдим. Жамоамиз биринчи давранинг ўзидаёқ жисмоний жиҳатдан толиқиб қолди. Бу эса давралар оралиғида ёшроқ, курашга чанқоқ йигитларни жамоага таклиф этишга ундаяпти.