Камерунлик ҳужумчи Самуэль Это~О дунё бўйлаб, сайру саёҳатини давом эттириб, Туркияга йўл олди. Биз шу онда унинг фаолиятидаги барча жамоаларни фотосуратлар ёрдамида эсга оламиз. Демак, бошладик: «Реал Мадрид» - «Анталья-спор» йўналиши...
Ҳаммаси 1997 йили бошланди. 16 ёшда эканлиги айтилган Самуэль Камерундан тўғри «Реал Мадрид»нинг ёшлар жамоасига ўтди. Это`О кейинчалик бир неча йил давомида (танаффус билан) «Қироллик клуби»нинг асосий таркибида атиги 5 марта майдонга тушиб, лоақал битта гол уролмади. Ҳаттоки, унинг туғма иқтидори ҳам ўша йиллари илдиз отган «галактикос» таркибидан жой олишига камлик қилди. Натижада камерунлик ёш ҳужумчи ижара саргузаштларини бошлашдан ўзга чора тополмади.
Это`О аввалига сегунда иштирокчиси - «Леганес»да кўриниш берди. Бироқ мавсум бўйи нақ 30та ўйинда майдонга тушганига қарамай, атиги 4та гол урди, холос. «Леганес»дан сўнг «Эспаньол» варианти юзага келди - яна ижара. Бироқ ҳужумчи Каталония клубида лоақал битта ўйин ўтказмади ва ҳаттоки, унинг либосидаги сурати ҳам сақлаб қолинмаган экан.
Испания ичида айланишнинг давоми. Бу сафар «Мальорка»дан қўним топган камерунлик йигитча ниҳоят, тўпурарлик қобилияти учқунларини кўрсатди. Орол жамоасида 4,5 йил тўп сурган африкалик ҳужумчи примеронинг ўзида 50тадан кўпроқ гол урди.
Самуэль шон-шуҳрат ва совринларга «Барселона»да эришди. Каталонияликлар 2004 йилнинг ёзида унинг учун 24 миллион евро тўлашди. Камерунлик аввалига Франк Райкаард, кейин Хосеп Гвардиола жамоасида самарали тўп суриб, Испания чемпионатида 3 марта, ЧЛда эса 2 марта зафар қучди. Бу ютуқлари қаторига 2тадан кубок ва суперкубокни ҳам қўшиб қўйди. Умуман, «Барселона»да 201та ўйин ўтказиб, 129та гол урди. Хусусан, Римда ташкил этилган ЧЛ финалида «МЮ» дарвозасини ишғол этди. Шунингдек, примеронинг энг яхши тўпурарига аталган соврин қатори яна бир қатор мукофотларни қўлга олди.
2009 йилнинг ёзида Это`Они узун бўйли Златан Ибрагимович билан алмаштиришди. «Барселона» бунинг учун бинойидек «устама ҳақи» ҳам тўлади. Бироқ бу келишувдан «Барса» ва Ибрагимович эмас, «Интер» ва Это`О кўпроқ наф кўрди. Чунончи, Златан Каталонияда турли муаммоларга йўлиқди, Самуэль эса Италияда яна бир марта ЧЛ кубогини ютди. Шунинг баробарида «А» серияси ғолибига айланди ва совринлари коллекциясига 2та кубок қўшиб қўйди.
2011 йилнинг ёзи. Это~О миллиардер Сулаймон Керимовнинг антиқа лойиҳаси - «Анжи» «юзи»га айланиб, ер юзида энг кўп маош олувчи футболчилардан бирига айланди.
«Анжи» ўз йўналишини «бирозгина» ўзгартирганида эса, Это`О Россия биринчи дивизионида ўйнаб кўриш имкониятидан фойдаланмади ва Жозе Моуриньо бошқарувидаги «Челси»га ўтди. Футболчининг асл ёши юзасидан турли ҳазил-ҳузулларга бой бўлган мавсумда ҳужумчи чакки кўрингани йўқ аслида. Аммо «Челси» умуман бошқа савиядаги ҳужумчига эҳтиёж сезаётганди.
Ўтган ёзда камерунлик футболчига қизиқиш унча баланд бўлмади, шунга қарамай, у якунда кутилмаганда, Англияда қолди. Яъни «Эвертон» клубига ёрдам беришни маъқул кўрди. Лекин бу ҳамкорлик на «Эвертон» ва на Это`Ога қандайдир наф берди. Натижада томонлар қишдаёқ яхшиликча хайрлашишди.
Шу тариқа камерунлик ҳужумчи Синиша Михайловичнинг қизиқарли лойиҳасига қўшилиб, «Сампдория» либосига бурканди. «Шартнома 2,5 йилга мўлжалланди, шундай экан, Это`О фаолиятини тугатган тақдирда ҳам, клубда қолиши ҳеч гап эмас. Бироқ қандайдир ваъда бериш ярамайди. Ахир ярим йилда барчаси ўзгариб кетиши ҳам мумкин-да»,-дея хабар беришганди клуб раҳбарлари ўшанда. Бежиз ваъда беришдан қочмаган эканлар. Это`О Генуяда мураббий билан унча келишолмади, машғулотларни ўзбошимчалик билан тарк этди ва бир қатор можароли воқеалар марказига тушди. Қисқаси, илк даврлардаёқ унинг «Сампдория»да ҳеч қанақасига 2,5 йил ушланиб қолмаслиги шундоқ сезилди. «Ўйлашимча, бу митти қушча тақдирига бошқа соҳилларга учиш ёзилган, чоғи. Ҳа, Это`О фаолиятининг охирига қадар «Сампдория»да қолиши мумкин эди. Бироқ ўзи кетишни ихтиёр этса, қалби ва чўнтагига қулоқ тутсин...»,-деди якунда «Сампдория» президенти Массимо Ферреро.
Мана, қалб туғёни ва чўнтак «иштаҳаси» Это`Они бу сафар Туркиянинг «Антальяспор» клубига равона қилди. Айтганча, бу жамоа супер-лигага энди чиқдию, дарҳол улкан ишларни амалга ошира бошлади. Айтайлик, бразилиялик афсунгар Роналдиньо ҳам шу клубда ўйнашга розилик берди. Это`Ога қайтсак, унинг «Ан-тальяспор» билан тузган шартномаси нақ 3 йилга мўлжалланган, лекин яна ярим йилдан сўнг барчаси ўзгариб кетиши ҳам мумкин...
