Қозоғистон чемпионатида ҳаракат қилаётган легионерларимиз бугун ўз жамоалари сафида майдонга тушишди.
Тажрибали ҳужумчи Александр Гейнрих ҳаракат қиладиган “Ордабаси” жамоаси навбатдаги турда “Иртиш” клуби майдонига сафар уюштирди. Саша 53-дақиқада захирадан майдонга қўшилган учрашувда меҳмонлар мағлубият аламини тотиб кўришди. Гейнрих жамоа биринчи голни ўтказиб юборганидан кейин майдонга туширилди, аммо ўйин охиригача ўйнай олмади. Сабаби 88-дақиқада қизил карточка олиб майдонни тарк этди. Якунда мезбонлар яна бир гол киритишди ва ғалабанинг ишончли бўлишини таъминлашди.
“Рубин”дан ижара асосида “Жетису”га ўтган яна бир юртдошимиз Бобур Давлатов эса янги жамоасининг ғалабасига кичик бўлса-да улушини қўша олди. “Жетису” ўз майдонида “Қайсар”ни қабул қилди ва 2:1 ҳисоби билан рақибдан устун чиқди. Бобур ўйиннинг 73-дақиқасида захирадан майдонга туширилди.
