Швейцариянинг Гштаад шаҳрида теннис бўйича соврин жамғармаси 494,310 еврони ташкил этувчи турнирнинг асосий тўр баҳслари давом этяпти. Хабар берганимиздек, ушбу мусобақада иштирок этаётган ҳамюртимиз Денис Истомин ҳам яккалик, ҳам жуфтлик мусобақасининг илк даврасида зафар қучган эди.
Мамлакатимизнинг биринчи рақамли теннисчиси энди яккаликнинг иккинчи даврасида швейцариялик Хенри Лааксонендан устун келган португалиялик Жоао Соузага қарши кортга чиқади. Бу учрашув бугун бўлиб ўтади. Бу йил юбилей 100-маротаба ташкил этилаётган Гштаад турнири ғолиби 80 минг евро мукофот пули ҳамда 250 рейтинг очкосига эга бўлади.
