Озарбойжоннинг «Габала» клуби журналист Расим Алиевнинг вафоти муносабати билан баёнот билан чиқди.

«Расим Алиевнинг ўлими ҳақидаги хабарни чуқур қайғу билан қабул қилдик. Ҳеч ким ҳеч кимга зўровонлик қилишга ва таҳдид қилишга ҳақли эмас — бу жамоамизнинг асосий принципларидан бири. Биз зўравонлик ва тажовузкорликни ҳамиша қоралаб келганмиз. Жамиятдаги тинчликнинг ўрнини таъкидлаб, бу йўналишда кўплаб ишлар қилганмиз.

Биз ОАВнинг кескин танқидларига ҳеч қачон муносабат билдирмаганмиз, ҳаттоки "Габала" муваффақиятсиз иштирок этганда ҳам. Кечаги воқеада Жавид Гусейновнинг номи тилга олинаётганидан афсусдамиз. Алиев ўзининг сўнгги интервьюсида ва Фейсбукдаги баёнотларида футболчи билан гаплашиб олгани ва уларнинг орасида муаммо қолмагани ҳақида ёзганди.

Мазкур воқеа ҳуқуқни ҳимоя қилиш органлари томонидан ўрганилишини ва айбдор жазога тортилишини истаймиз. Жавид Гусейнов жамоанинг муҳим аъзоси бўлишига қарамай, воқеаларга ойдинлик киритилгунга қадар у жамоадан четлатилди. Расим Алиевнинг яқинларига ҳамдардлик билдирамиз», – дейилади клуб баёнотида.

Журналист Расим Алиев ЕЧЛ саралаш босқичи доирасида "Аполлон"га қарши ўйинда Гусейновнинг хатти-ҳаракатларини Фейсбук орқали танқид қилганди. 27 ёшли футболчи Туркия байроғини хилпиратиб, ҳақоратли ишоралар қилган.

Аввалроқ эса Алиев ўзига номаълум киши қўнғироқ қилгани, ўзини Гусейновнинг қариндоши сифатида таништиргани ва уни учрашувга таклиф қилгани ҳақида айтганди.

Учрашувда эса Алиевга 5-6 киши ҳужум қилган ва журналистни дўппослашган. Шундан сўнг у шифохонага тушган, аммо операциядан омон чиқмаган.