Астана шаҳри (Қозоғистон)да дзюдо кураши бўйича ўтказилаётган жаҳон чемпионатида бугун эркаклар ўртасида -90 кг. вазнда, хотин-қизлар ўртасида эса -70 кг. вазн тоифасида ғолиб ва совриндорлар аниқланди.

Эркаклар ўртасида бўлиб ўтган мусобақада ғолибликни Донг Хан Гвак (Ж.Корея) қўлга киритди. Ҳал қилувчи финал учрашувида у россиялик Кирилл Денисовни мағлуб этди. Ушбу вазн тоифасида бронза медалларга Варлам Липартелиани (Грузия) ҳамда Машу Бакер (Япония) сазовор бўлдилар.

Бугун бўлиб ўтган беллашувларда ҳамюртларимиздан Шерали Жўраев ва Гулноза Матниёзова иштирок этишди. Шерали Жўраев дастлабки баҳсдаёқ япониялик Машу Бакерга имкониятни бой берган бўлса, Гулноза Матниёзова Венгрия ҳамда Янги Зеландия вакилларини енгиб, колумбиялик спортчига имкониятни бой берди.

Бешинчи кунги мусобақалар якунларига кўра Япония терма жамоаси 5 та олтин, 2 та кумуш ва 4 та бронза медали билан умумжамоа ҳисобида биринчи ўринда бормоқда. Бугун бўлиб ўтган мусобақалардан сўнг Жанубий Корея терма жамоаси иккинчи ўринга кўтарилиб олди. Улар ҳисобида ҳозирча 2 та олтин ва 3 та бронза медали мавжуд. Кучли учликни Франция терма жамоаси якунлаб турибди. Франциязлар ҳисобида 1 та олтин, 2 та кумуш ва 2 та бронза медали бор. Ўзбекистон терма жамоаси битта бронза медали билан 120 давлат орасида 17-ўринда боряпти.

29 август куни эркаклар ўртасида -100 кг. вазнда, хотин-қизлар ўртасида эса -78 кг. вазн тоифасида беллашувлар ўтказилади. Шу куни ҳамюртларимиздан Рамзиддин Саидов совринли ўринлар учун курашга киришади.

Шавкат Жалилов