Ўзбекистон миллий терма жамоаси Филиппинга жўнаб кетишидан олдин терма жамоамиз сардори Одил Аҳмедов “Локомотив” футбол мактаби тарбияланувчилари билан учрашди.
Одил Аҳмедов Сайдулла Турсунов мураббийлик қилаётган “Локомотив-2005″ футболчиларининг машғулотини кўриш учун Лабзакдаги машғулот майдонига ташриф буюрди. У ерда моҳир ярим ҳимоячини “Локомотив” жамоаси бошлиғи Қобил Юнусов, футбол мактабимиз директори Эркин Саидов ҳамда мураббийлар Сайдулло Турсунов ва Суннат Рўзиев кутиб олишди.
Одил Аҳмедовдек футболчи билан учрашув ёш болакайларда илиқ таассурот қолдирди. Улар Аҳмедовга ўзларини қизиқтирган саволлар билан мурожаат этишди, шунингдек бирга суратга тушишди. Маълумки, “Локомотив” футбол мактаби ўз олдига катта мақсадларни қўйган. Аввало етук ва келажаги порлоқ истеъдодларни тарбиялаб бериш бирламчи вазифаларимиздан бири ҳисобланади. Бунинг учун ўзбекистонлик таниқли футболчилар билан турли учрашувлар ташкил этиш ҳам футбол мактаб дастуридан ўрин олган. Чунки ҳар қандай соҳада бўлгани каби футболда ҳам юлдуз бўлиш учун ҳақиқий юлдузлардан ўрнак олиш керак бўлади.
Одил Аҳмедов мамлакатимизнинг энг кучли футболчиларидан бири. Унинг катта футболга кириб келиши “Локомотив”да рўй берган, бироқ кейинчалик “Пахтакор”га ўтиб кетган. Футболчи ҳозирда фаолиятини Россия премьер-лигаси вакили “Краснодар”да давом эттирмоқда. У яқинда миллий терма жамоамизнинг янги сардори этиб тайинланди. Одил Аҳмедов учрашув охирида 10-рақамли футболкасини “Локомотив” футбол мактаб директори Эркин Саидовга эсдалик совға сифатида тақдим этди.
“Локомотив” ПФК матбуот хизмати.
