Германия терма жамоасининг собиқ афсонавий футболчиси Лотар Маттеус Франция миллий терма жамоаси ва «Бавария» клуби ҳужумкор ярим ҳимоячиси Майкл Олисенинг ЖЧ-2026’даги имкониятлари ва истиқболлари ҳақида юқори фикрлар билдирди. Бу ҳақда Bild нашри хабар бермоқда.
«Мбаппе — гол уриш борасида ҳақиқий «машина». Бироқ, менга назаримда, Олисе ушбу мундиалда Килианни сояда қолдириб кетиши мумкин. Майкл нафақат гол уришни билади, балки майдонда ҳақиқий сеҳр кўрсата олади. Агар у Жаҳон чемпионатининг энг яхши футболчиси деб топилиб, «Олтин тўп» совринини қўлга киритса, бундан асло ҳайратланмайман», — дея Маттеуснинг сўзларини келтирмоқда матбуот.
Маълумот учун, айни дамда 24 ёшли Майкл Олисенинг трансфер қиймати нуфузли порталлар томонидан 150 миллион еврога баҳоланмоқда ва у дунёнинг энг қимматбаҳо футболчиларидан бири ҳисобланади.
Эслатиб ўтамиз, Жаҳон чемпионати—2026 гуруҳ босқичида Дидье Дешам бошчилигидаги Франция терма жамоаси Сенегал, Норвегия ва Ироқ терма жамоаларига қарши баҳс олиб боради.
