Бир қанча ўйинларни четдан кузатган ушбу футболчи майдонга қайтишга тайёрми? Буни Синиша Михайлович ҳал қилади. Афтидан, Марио яна ўзини кўрсатишга шай. Варшавада Германия термаси дарвозасини ишғол қилгандан кейинги қилиғи ёдингиздами? Бу воқеа 2012 йилнинг 28 июнида содир бўлганди. Орадан беш ой ўтиб, муқовасини ушбу форвардга атаган Time журнали кейинчалик Балотеллини жаҳоннинг 100 нафар энг обрўли шахслари қаторига қўшди. Sport Illustrated эса 2013 йилнинг авгус­тида италиялик футболчини «сайёрамизнинг энг қизиқарли кишиси», деб таништирди. Шундан сўнг бир аср ўтгандек туюлди. Бироқ Марио яна қайтди. У айбини тан олди, ортга қараб, хатоларини сарҳисоб қилиш орқали анча ўзгарганини тушунтириш пайида: «У Марио болакай эди, ҳозирги Марио эса - улғайган эркак». Хатоларни такрорламаслик учун ўтмишни унутмаслик керак. Ҳаётда янги саҳифа очиб, фақат олдинга интилиш пайти келди. «Ўзимни фаолиятининг биринчи қисмини ортда қолдирган футболчидек ҳис қиляпман. Ўйиним ҳам, яшашим ҳам болакайларга хос эди. Ҳаммаси ўйлаганимдек кечмади, кўплаб имкониятларни йўққа чиқардим. Аммо баҳс ҳали якунланганича йўқ... Олдимда ҳали иккинчи тайм турибди. Эндиликда улғайганимни намойиш этаман. Тўғри, кўпчилик менинг омадли қайтишимга ишонмайди. Айнан шу тоифа инсонларнинг ноҳақ эканликларини исботлашим шарт. Буни албатта, уддалайман». Бу сўзларда эски такаббурлик сезиляптими? Марио­нинг мақсади - шубҳаларни аритиш. Асосийси, унинг кўзларидаги димоғдорлик ва сурбетлик ўрнини қатъият ва ишонч эгаллагандек.

- Галлианининг айтишича, бу сен учун энг сўнгги имконият эмиш...

- Ўзим, оилам, «Милан», Михайлович, Райола, умуман, мени яхши кўрувчи барчага ваъда берганман ва уни бажаришим шарт. Ҳаммасини нолдан бошлаяпман. Албатта, эндиликда хато қилишга ҳаққим йўқ, ниманидир талаб қилиш имкониятига ҳам эга эмасман. Барчасига ўзим эришишим даркор. Бунга тайёрман, ҳар қандай шартга кўнаман. Майдонга тушишга лойиқ кўрилсам, ўйнайман. Асосийси, футбол нималигини унутганимча йўқ. Ҳозир куч-қувватга тўлган, меҳнат қилишга иштиёқим ортган пайт.

- Ниҳоят, улғайганингни қачон пайқадинг?

- 25га тўлдим, энди ёш бола эмасман. Кўплаб имкониятларни кўкка совурдим. Лекин бу ҳаёт, олдинда нима кутиб турганини олдиндан айтиш мушкул. Баъзан тақдир сенга ўзгаришинг лозимлигини уқтираркан. Айрим вазиятлар улғайишга замин яратаркан. Мисол учун, фарзанд қувончи ва отамни йўқотганимдан кейинги қайғу.

- Қизингнинг табассуми сен учун нимани англатади?

- Беҳад муҳаббат. Пиа кулиши ҳамоноқ оқ-қора кўринган дунё рангларга бурканади. Қизалоғимни жуда яхши кўраман. У билан гаплашганимдан кейин ҳаммаси ўзгарди: мени танияпти, тушуняпти, бу ажойиб... Фарзандим ёнимда бўлиши учун қўлимдан келган барча ишни амалга ошираман.

- «Милан»га қайтиш фикри қачон пайдо бўлди?

- Мино кутилмаганда қўнғироқ қилиб, шундай деди: «Нарсаларингни йиғиштириб, Италияга уч. Миланга қайтяпсан». Оддий рейс билан айтилган жойга бордим.

- Энди ҳеч кимга керакмассан, деб ўйлагандик...

- Йўқ, янги жамоа топишимга ишончим комил эди. Фаолиятимга якун ясашга ҳали эрта. Энг аввало, «Милан»дан миннатдорман. Тўғрисини айтсам, уларнинг менга яна ишониб, таклиф этишларини кутмагандим. Мазкур қайтиш - орзумнинг амалга ошгани. Иккинчи имконият ҳаммага ҳам берилавермайди. Бу борада омадим келгани аниқ.

- «Ливерпул»даги омадсизликка нима сабаб бўлди?

- Айбимни тан оламан, аммо Рожерснинг тактикаси менга тўғри келмади. Дастлаб бир нечта қулай вазиятлардан фойдалана олмадим, чунки гол уриш имкониятим кам эди, омадим келмади, жароҳатлар бошланди... Бироқ ҳеч қачон тортишмаганман, мураббийнинг барча қарорларини тўғри қабул қилиб, ўзимни профессионалларга хос тарзда тутганман.

- Ҳозирдаги жисмоний ҳолатинг ёмон эмас, шундайми?

- Жуда кўп машғулотларда қатнашдим. Сўнгги ойда Хосе Энрике ва Борини билан шуғулландик: қийналганим рост, аммо формамни тиклашга интилмаганимда «Милан» машғулотларида ўлиб қолишим ҳеч гап эмасди. Михайловичнинг бу борадаги услуби оғир, аммо ўзимни яхши ҳис қиляпман.

- Дарвоқе, Синишани қандай кўндирдинг?

- У мени болалигимдан яхши билади. Ўйинчилик сифатларим ҳеч қачон муаммо туғдирмаган, шунчаки феъл-атворим... Мен ҳақимда турли уйдирмаларни гапиришади, «пашшадан фил ясашади». Михайловичнинг юзма-юз гаплашиб кўрмоқчилигини тўғри тушуниш мумкин. У гапларимни диққат билан тинглади, турли гап-сўзларга эътибор бермади. Шунинг учун мураббийдан миннатдорман.

- Унга нима дединг?

- Хатоларимни тушунганим, яна бир бора имконият берса, уялтириб қўймаслигимни айтдим. Қўлимдан келган барча ишни бажаришга тайёр эканим, муаммолар туғдирмаслигим, унинг барча қарорларини ҳурмат қилишга ваъда бердим. Михайлович - етакчи, қаттиққўл, аммо ҳақиқатпарвар ва самимий инсон. У ҳеч қачон алдамайди. Суҳбат пайтида кўзга қарайди ва бу менга ёқади. Синиша бизга футболчи эмас, балки инсон сифатида қарайди. Кўп жиҳатларда ундан қарздорман.

- Галлианининг таъбири билан айтганда, «айрим севги қиссалари якунланмайди». Аммо кўплаб футболчиларнинг «Милан»га қайтишлари омадсиз якунланган.

- Олдимда турган муҳим вазифалардан яна бири - бу анъанага чек қўйиш. Хато қилмаганимни намойиш этишим шарт. Менга ишонч билдиришаётганини ҳар сонияда ҳис қилиб турибман.

- Берлускони яқинда сени чириган олмага ўхшатганига қарамай, яна қабул қилди...

- Унинг Миланга кўчиб ўтишимга рухсат бергани - энг кутилмаган воқеа. Бундан умид қилмаётгандим. Берлусконининг гапларига келсак, ҳеч қачон чириган олма бўлмаганман.

- Ҳали «Милан»га ўтганинг расман тасдиқланмай туриб, ОАВда янги спорт автомобилингни муҳокама қилишга тушиб кетишди.

- Матбуот ҳар доим мен ҳақимда гапиришга сабаб топишган. Спорт машиналарини ёқтираман, бу борада ягона футболчи эмасман. Миланеллога барча ўйинчилар сингари жамоа тақдим этган Audiда бораман.

- ОАВ билан муносабатларингга ҳавас қилиб бўлмайди. Биргина «Нега доим мен?» жумласини эсга олишнинг ўзи кифоя.

- Майдондаги ҳаракатларимни муҳокама қилишларини хоҳлайман. Тан оламан, буни ҳар доим ҳам уддалаб бўлмайди. Ўз навбатида, ортиқча эътиборни ёқтирмайман, дея олмайман. Аммо мен ҳақимда кўпинча ҳақиқатга зид маълумотлар ёзишади. Ахир бир йил давомида тинимсиз танқид қилиб, кейин Италия терма жамоасини ўз ортимдан эргаштиришим лозимлигини уқтиришлари адолатданми?

- «Милан» билан тузилган шартномада ташқи кўринишинг ва ижтимоий тармоқлардан фойдаланишинг борасида қатъий талаблар қўйилгани ростми?

- Менинг ёшимда ижтимоий тармоқлардан фойдаланиш одатий ҳол. Авваллари хоҳлаган ишимни қилаверардим, энди эса янада диққатлироқ бўлишни ўргандим. Талабларнинг борлиги ҳақиқат, аммо гап бунда эмас. Кўринишим Миланга хос бўлишини талаб қилишди, бу менга муаммо туғдирмаслиги аниқ. Сочни текислаш? Бунинг ҳам иложи бор. Медальонимни эса онам совға қилган. Унда шундай ёзувлар бор: «профессионаллик, итоат, ғайрат». Уни ечиб қўяйми? Кимгадир ёқмаслигим мумкин, аммо ҳеч кимга ёмонлик қилмаганман. Зарар кўрган ягона нарса - менинг фаолиятим.

- Стадиондаги «илиқ» муносабатларга тайёрмисан?

- Ҳуштакбозликлар тўхтаб қолса, ачинишим аниқ. Чунки бу мендан қўрқмасликларини англатади... Ҳуштакларга кўникканман, бу борада муаммо йўқ. Рақиб ишқибозлари фақат бир марта чалғита олишган, холос. Вероналик мухлисларнинг ҳайқириқларидан сўнг ўзимни йўқотиб қўйгандим. Аммо ташвиқотларга қарамай, ҳаммани ҳурмат қиламан: рақиблар, ҳакам, ишқибозлар... Иложи борича ҳеч ким билан тортишмаслик, тиффозига имо-ишоралар қилишдан тийиламан.

- Яна ўша одатий ва машҳур «бууууу»ни эшитиб қолсанг-чи?

- Ирқчиликни енгиб ўтиш керак. Аслида, ҳакам шундай паллаларда ўйинни тўхтатиши керак. Агар буни амалга оширмаса, майдонни тарк этмайман, ҳеч нима демайман, шунчаки ўйинни давом эттираман. Аммо кейинроқ интервью бериш чоғида фикримни албатта билдираман. Мазкур иллатни шунчаки эътиборсиз қолдириш ниятим йўқ. Мени ҳурмат қилишларини хоҳлайман. Жамоалари мағлубиятга учраётганда танам ранги учун мени ҳақорат қилишади-да, кейин терма жамоада гол уришимни талаб қилишади. Буни қандай тушуниш мумкин? Келгуси йили Европа чемпионати кутиб турганини инобатга олсак, ҳамма бир мақсад йўлида бирлашиши лозим.

- Евро ҳақида ўйлаяпсанми?

- Албатта, «Милан»да ўзимни кўрсатиб, термадан жой олишни мақсад қилганман. Кўпроқ ишлаб, шошилмасликка интиламан. Франциядаги чемпионатга бориш учун ҳамма нарсага тайёрман. Отам яна бир бор Скуадра Адзурра таркибида кўришни хоҳлаганди. Буни унинг ҳурмати учун амалга оширишим шарт.

- «Милан» билан қандай марраларни кўзлаш мумкин?

- Ишончим комил, юқори ўринларни қўлга киритамиз. Ажойиб жамоамиз бор.

- Учинчи турда «Милан дербиси» ўтказилади. Унда гол уриш учун нимангдан воз кеча олардинг?

- Шошманг, мени шунчаки лаққа туширолмайсиз. Интервьюга чиройли сарлавҳа топмоқчига ўхшайсиз. Афсуски, ололмайсиз. Ҳар доим гол уришни хоҳлаётганимни айтсам, омадим келмайди. Бу баҳс мен учун муҳим аҳамиятга эга, албатта, дербида ғолиб чиқишни хоҳлайман. Мазкур қарама-қаршилик нафақат бир ўйин, балки бутун мавсумга татийди. Умуман, дербида гол уришни хоҳламайдиган футболчи бормикан ўзи?

- Бир кишининг айтишича, сен футболни чин дилдан севмас экансан. Ўйинларингда эҳтирос сезилмасмиш. Бу ерда шундай фикр туғиляптики, гўё сен «миллионлар ўйини»дан роҳатланмайсан, шунчаки сен учун бутун дунё билан баҳслашиш муҳимроқдек...

- Йўғ-е, футбол - менинг ҳаётим, бу спорт турига болалигимда меҳр қўйганман. Уни жуда яхши кўраман. Ўйнаш учун оилам ва Италияни ташлаб кетдим. Ишонинг, ҳеч ким билан баҳслашмайман. Жамоадошларимдан сўраб кўринг, кийиниш хонасида ҳаммадан кўп мен ҳазиллашаман. Майдонда эса футболни ёмон кўрганим учун эмас, балки диққатимни жамлашга уринганим учун жиддийликка урғу бераман.

- Ниҳоят, гол урганингдан кейин юзингда табассум кўрамизми?

- Буни Михайлович ҳам сўради. Менимча, айнан шу  масалада ваъда беролмасам керак. Аммо гол урганимда доим хурсанд бўламан. Аввал дарвозани ишғол қилаверайчи, қолганини вақт кўрсатади...

ТАКАББУР ЙИГИТЧАНИНГ МАШҲУР ФИКРЛАРИ

* «Барселона»га ўтиш? Мен қизлар билан ўйнамайман»

* «Жаҳонда мендан яхши ўйнайдиган фақат биргина футболчи бор. Бу - Месси. Бошқалар кейинги ўринларни эгаллаб туришибди»

* «Сильвио Берлусконининг айтишича, италиялик энг маҳоратли ўйинчи - Антонио Кассано экан. У ё алдаяпти ёки Балотеллининг борлигидан бехабар»

* «Моуриньо - жаҳоннинг энг яхши мураббийи. Аммо у феъл-атворидаги қусурларини йўқотиши, бошқаларга нисбатан ҳурмат билан муносабатда бўлишни ўрганиши лозим»

* «Сити» ишқибозлари мен ҳақимда қўшиқ куйлашаётганда кўнглимда илиқлик ҳис этаман. Улар шуни билишсинки, гарчи юзимда табассум кўринмасада, қалбим доимо кулиб туради»

* «Нега гол урсам уни нишонламайман? Чунки футбол - менинг ишим. Масалан, поч­тачи ҳар гал мактубни манзилга етказганида хурсандчиликдан қарсак чалиб, ўйин-кулгуга берилмайди-ку»

* «Манчинининг айтишича, баъзан юзимга мушт туширгиси келаркан. Афсуски, бундай қилолмайди. Мен тайча бокс билан шуғулланаман»

* «Уэйн Руни иқтидорли ўйинчи, аммо у Манчестердаги энг яхши футболчи эмас»

* «Бир гал полициячилар тинтув чоғида орқа чўнтагимдан 5 минг фунт топиб олишди. Улар нима сабабдан шунча пулни кўтариб юрганимни сўрашганида биргина жавоб билан кифояланганман: «Чунки  бадавлатман»

* «Мен ёмон йигит эмасман, шунчаки уятчанман»

* «Нега доим мен?»

* «Мен билан шахсан таниш бўлмаганларнинг аксарияти мени аҳмоқ деб ўйлашади»