Кеча вилоят иккинчи лигаси “А” гуруҳида 14-тур доирасидаги бир қатор учрашувлар бўлиб ўтди.

Косоннинг “Аланга” жамоаси турнирнинг иккинчи поғонасида бораётган Нишоннинг “Нуристон” жамоасини қабул қилди. Тенг курашлар остида ўтган ушбу баҳсда омад нишонликларга кулиб боқди. Улар косонликларни 2:1 ҳисобида мағлубиятга учратишди ва муҳим уч очкони ўз ҳисобига ёзиб қўйиши. Шу билан “Нуристон” жамоасининг жамғарган очколари сони 25тага етди.

Қаршида Элдор Мойлиев бошчилигидаги “Насаф ФМ” жамоаси ўз майдонида “Шўртан-99” жамоасига қарши баҳс олиб боришди. Баҳс анча шиддатли ва муросасиз кечди ўйин давомида ёш “насаф”чилар рақибларига нисбатан анча кучли эканликларини кўрсатиб қўйишди, натижа ҳам шунга яраша бўлди. “Насаф ФМ” жамоаси “Шўртан-99” жамоасини 6-1 ҳисобида доғда қолдирди.

Бугун 14-турнинг қолган учрашувлари ўтказилади. Турнинг марказий учрашуви албатта Ғузорда “Шўртан-ФМ” – “Машъал-3” жамоалари ўртасида бўлиб ўтади. Турнир пешқадами бўлган “Машъал-3” жамоаси, Акмал Саитқулов бошчилигидаги “Шуртан-ФМ” жамоасига қарши майдонга тушади. Энг қизиғи, мубораклик ёш футболчилар мағлубиятсиз сериясини давом эттира олишадими йўқми, буни бугун билиб оламиз.

Бугун бўлиб ўтадиган учрашувлар:

“Машъал- А” (Муборак) – “Хисор” (Шахрисабз)

“Шўртан-ФМ” (Ғузор) – “Машъал-3” (Муборак)

“Олимпия” (Қарши) – “Насаф-99” (Қарши)

                                                                                       Фахриддин ЧОРИЕВ.