Малайзияда нуфуз жиҳатдан иккинчи ўринда дея эътироф этиладиган премьер лига баҳсларининг 2015-йилги мавсуми ўз якунига етгани ва унда ҳамюртларимиз Фарҳод Тожиев ва Садриддин Абдуллаев тўп сурадиган “Т-Тим” клуби учинчи ўринни банд этиб, Супер Лигага йўл ола билмаганидан хабарингиз бор.
Ҳар икки ҳамюртимиз ҳам ҳамон мазкур жамоа сафида бўлиб туришибди ва улар катта эҳтимол билан яна бир мавсум давомида Малайзия қуйи дивизионида фаолият олиб боришади.
Кеча “Т-Тим” клуби Малайзия Кубоги доирасида навбатдаги ўйинини ўтказди. Бу гал рақиб Супер Лига вакили “Селангор” бўлди. Кескин курашларга бой тарзда ўтган ўйинда Малайзия Супер Лигаси етакчиларидан бири кичик ҳисобда ғалабага эришди. Ҳамюртимиз Садриддин Абдуллаев ўйинни бошланғич таркибда бошлаб, тўлиқ 90 дақиқа ўйнаган бўлса, Фарҳод Тожиев ҳали жароҳати тузалиб кетмагани боис майдонга қайтгани йўқ.
“Т-Тим” ушбу матчдан сўнг гуруҳларга бўлиб ўтказиладиган Малайзия Кубоги мусобақасининг “C” гуруҳида сўнгги ўринни банд этиб турибди.
