ЎФФнинг собиқ бош котиби Зокир Қурбонов хотирасига бағишлаб, 2003 йилда туғилганлар ўртасида ташкиллаштирилган турнир якунланди.

Бугун ЎФФ суъний қопламали майдонида турнирнинг ҳал қилувчи – 3-ўрин учун ва финал ўйинлари бўлиб ўтди. Даставвал, учинчи ўрин учун “Насаф” ва “Локомотив” клубларининг 2003 йилда таваллуд топган тарбияланувчилари курашишди. Учрашувнинг асосий вақтида 1:1 ҳисоби қайд этилиб, ғолиб пенальтилар сериясида аниқланди.  Унда қаршиликлар омадлироқ чиқишиб, бронза медалларини қўлга киритишди.

Шундан сўнг хотира турнири ғолиблиги учун “Бунёдкор” ва “Пахтакор” жамоалари куч синашдилар. Бош соврин учун ҳар иккала жамоа вакиллари бир-бирларига муносиб қаршилик кўрсатишди. “Бунёдкор” ҳам, “Пахтакор” ҳам асосий эътиборини ҳимояга қаратган ҳолда қарши ҳужумлардан ва рақиб хатосидан унумли фойдаланишга ҳаракат қилишди. Финалнинг асосий вақтида ҳисоб очилмади – 0:0. Шундан сўнг ғолибни аниқлаш учун пенальтилар сериясига мурожаат қилинди. Унда “Бунёдкор-2003” вакиллари 4:2 ҳисобида устун келиб, Зокир Қурбонов хотирасига бағишлаб, 2-бор ўтказилган мусобақа ғолиблигини қўлга киритди.

Шуни қўшимча қилмоқчимизки, футбол клублари тарбияланувчилари ўртасидаги Тошкент шаҳар чемпионатида доирасида ҳам шу икки жамоа бир-бирлари билан рўбарў келишган ва унда “Бунёдкор” тарбияланувчилари 1:0 ҳисобида ғолиб чиқишган эди.

Мусобақа якунига кўра, “Бунёдкор” посбони Хумоюн Сайётов турнирнинг энг яхши дарвозабони деб топилди.

Ушбу муваффақият билан 2003 йилда туғилган жамоамиз футболчиларини ҳамда мураббийлар Фурқат Самегов ва Алишер Иброҳимовни табриклаймиз.