"Реал" бош мураббийи Альваро Арбелоа Чемпионлар лигаси умумий босқичи 7-турида "Монако" устидан қўлга киритилган йирик ғалаба (6:1) ҳақида фикр билдирди.

"Мен хурсандман, аммо энг аввало — футболчилар, мухлислар учун бахтиёрман. Умуман олганда, мадридизм учун хурсандман. Биз ўртамиздаги бундай бирлик ва шундай ўйин билан ҳали қолган барча совринлар учун кураша оламиз.

Мен мухлисларнинг Винисиусни қўллаб-қувватлаб, унинг исмини баланд овозда қичқирганини эшитдим. Ҳатто дарвозабон унинг зарбасини ажойиб тарзда қайтарганида ҳам, мухлислар Винисиусни олқишлади. Унга бу муҳаббат жуда керак. Вини — ёш, жуда ҳиссиётли йигит. Унга қўллаб-қувватлаш зарур. Унга осон эмас, аммо "Сантьяго Бернабеу" унга жавоб қайтарди — унинг кайфияти, истеъдоди ва меҳнаткашлиги учун миннатдорлик билдирди. Айнан шундай ўйинлар вазиятни ўзгартиришга ёрдам беради", — дея Арбелоанинг сўзларини келтирди UEFA матбуот хизмати.

Ушбу ғалабадан кейин "Реал" 15 очко билан Чемпионлар лигаси умумий босқичи турнир жадвалида иккинчи ўринни эгаллаб турибди. "Монако" эса 9 очко билан 20-поғонада бормоқда.