"Реал" ҳужумчиси Винисиус Жуниор Чемпионлар лигаси умумий босқичи 7-турида "Монако"га қарши ўйиннинг (6:1) энг яхши футболчиси деб топилди. 25 ёшли бразилиялик футболчи ушбу баҳсда 1 та гол урди ва 2 та голли узатмани амалга оширди.
"У аниқ реализация, ажойиб позиция танлаш ва хотиржамлик ҳисобига битта гол урди ҳамда икки марта шерикларига гол уришга ёрдам берди. Шунингдек, бразилиялик ҳужумчи тўпсиз ҳолатда ҳам "Реал"нинг чап қанотида жуда фаол меҳнат қилди", — дея таъкидлади UEFA техник кузатувчилари гуруҳи.
Ушбу ғалабадан сўнг "Реал" 15 очко билан Чемпионлар лигаси умумий босқичи турнир жадвалида иккинчи ўринни эгаллаб турибди.
