Хабарингиз бор, айни пайтда Олий Лига-2015 ҳал қилувчи палласига кириб бормоқда.

Чемпионат олтин медаллари учун бир вақтда нақд учта клуб кураш олиб бораётган бўлса, Осиё Чемпионлар Лигаси плей-офф босқичида қатнашиш имконини тақдим этадиган 4-ўрин учун баҳс жуда шиддатли кўриниш олган. “Бунёдкор” ҳамда “Нефтчи” жамоалари ўртасида ҳозирча 3 очко фарқ мавжуд. Ҳар икки клуб ҳам якунда 4-поғонадан ўрин эгаллаш учун ҳаракат қилмоқда.

Фарғоналиклар жамоаси аъзоси Отабек Исроиловнинг айтишича, “Нефтчи” чемпионат охирига қадар 4-ўрин учун кураш олиб боради.

- Ҳали олдинда 4 та учрашувимиз бор. Биз агар манашу 4 та ўйинда фақат ғалаба қозона олсак, ўз мақсадимизга етишимиз мумкин бўлади. Ҳозирда Чемпионлар Лигаси йўлланмасини эмас, балки қолган 4 ўйинда зафар қучиш ҳақида ўйлашимиз керак. Биздан талаб қилинаётгани шу. Қолганини эса мавсум якунига етгач кўрамиз. Аммо биз охиригача кураш олиб борамиз, - дейди тажрибали ҳужумчи SPORTS.uz мухбирига.