Хабарингиз бор, айни пайтда Ўзбекистон миллий терма жамоаси ярим ҳимоячиси Сардор Рашидов фаолиятини Қатарнинг “Ал Жайиш” жамоасида давом эттирмоқда.
Секин-аста “Жайиш” сафида етакчилардан бирига айланиб бораётган маҳоратли футболчи 2015 йил якунларига кўра Осиёнинг энг яхши футболчиси деб топилиши мумкин. “Ал Жайиш” матбуот хизматининг маълум қилишича, Сардор Рашидов 2015 йилда қитъамизнинг энг яхши футболчиси дея эътироф этилиши мумкин бўлган 10 нафар номзоддан бири бўлиб турибди.
Маълум бўлишича, мазкур рўйхатдан Ғарбий Осиё жамоаларида фаолият олиб борадиган қуйидаги футболчилари ҳам ўрин олишган:
Муҳаммад Саҳлави – Ал Наср, Саудия Арабистони
Аҳмад Ҳалил – Ал Аҳли, БАА
Омар Абдул Раҳмон – Ал Айн, БАА
Салмон Ал Фараж – Ал Ҳилол, Саудия Арабистони
Ёсир Ал Шахрони – Ал Ҳилол, Саудия Арабистони
Мазкур 10 талик рўйхатдан ўрин олган қолган футболчилар эса катта эҳтимол билан Шарқий Осиё жамоаларида тўп суришади. Аммо уларнинг айнан қайси футболчилар экани ҳали маълум эмас. Шуниси аниқки, йилнинг энг яхши футболчиси ноябр ойида ОФКнинг тантанали маросимида эълон қилинади.
Шу пайтга қадар Ўзбекистонлик футболчилар орасида фақатгина Сервер Жепаров қитъада тенгсиз футболчи дея топилганди. Сервер 2008 ва 2011 йилларда Осиёнинг энг яхши футболчиси бўлганди.
