Олий лиганинг 28-турида “Насаф” Самрқандда “Динамо” жамоаси меҳмони бўлиб, дурангга эришди.

Учрашув қаршиликларнинг ташаббуси билан бошланди. Ўйиннинг 5-дақиқасида Шоҳруҳ Гадоев ўз қаноти орқали ҳужум ташкил этди. Гадоев майдон марказидан кириб келаётган Артур Геворкянни кўра билди ва жамоамиз сардорига тўпни қулай тарзда етказиб берди. Артур Геворкяннинг дарвоза томон йўллаган зарбасини Муҳиддин Худоёров иккинчи уринишда ушлаб олди. "Динамо" ҳам бу ҳужумга жавобан тезда олдинга интилди ва Камолиддин Мурзоев жуда қулай вазиятга чиқиб борди. Мезбонлар ҳужумчиси Мурзоев томонидан дарвозага йўлланган зарба ноаниқ кўриниш олди.

Учрашувнинг 16-дақиқасида Фарруҳ Сайфиев дарвозабон билан яккама-якка вазиятга чиқди. Бироқ Сайфиев тўпни ўзидан узоқлаштириб юборгани сабабли бу имконият қўлдан бой берилди.

Ўйиннинг дастлабки 20 дақиқаси "Насаф"нинг устунлиги остида ўтди. Учрашувнинг 21-дақиқасида Алишер Юсуповнинг узоқдан йўллаган зарбаси хавфли, аммо бироз ноаниқ кўриниш олди. "Аждарлар"нинг чап қанотдан уюштирган ҳужумини Фарруҳ Сайфиевнинг ўзининг чиройли зарбаси билан самарали якунламоқчи бўлди. Аммо Сайфиевнинг дарвозага йўллаган зарбаси тўсинга тегиб қайтди.

Биринчи бўлимда "Насаф№" кўплаб ҳужумларни амалга оширган бўлсада, таблодаги ҳисоб ўзгармай қолди - 0:0.

Иккинчи бўлимни майдон эгалари анча кўтаринки руҳда бошлашди. Камолиддин Мурзоевнинг чамаси 16-метрлардан берган кучли зарбасини Ўткир Юсупов бартараф этишга муваффақ бўлди.

Учрашувнинг 53-дақиқасида Камолиддин Мурзоев дарвозабон билан бирга-бир чиқди ва ерлатиб зарба йўллади. Бироқ бу вазиятда Ўткир Юсупов ўз постини муносиб тарзда қўриқлай олди ва жамоамизни муқаррар голдан сақлаб қолди.

Беллашувнинг 67-дақиқасида Камолиддин Мурзоевни жамоадошлари қулай вазиятга чиқаришди. Ҳужумчи эса ўткир бурчакдан дарвозани аниқ нишонга олди ва жамоасини ҳисобда олдинга олиб чиқди - 1:0.

Ўтказиб юборилган голдан сўнг меҳмонлар ҳужумга зўр беришди. Захирадан майдонга тушган Дониёр Нарзуллаев ўнг қанотдан жарима майдончаси ичида турган Илҳом Шомуродовга тўпни ошириб берди ва ҳужумчимиз боши билан дарвозани аниқ мўлжалга олди - 1:1.

Шундан сўнг ҳар иккала жамоа аъзолари ҳимояда ишончли ҳаракат қилишди ва ўйинда бошқа гол киритилмади.

Шундай қилиб "Насаф" Самарқанддан бир очко билан қайтди ва турнир жадвалида учинчи поғонада қолди. "Динамо" эса Олий лигада қолиш учун курашишда давом этади.

«Динамо» (Самарқанд) – «Насаф» (Қарши) 1:1
31 октябрь 2015. Самарқанд. "Динамо" стадиони. 15:00
Голлар: Камолиддин Мурзоев (67) — Илҳом Шомуродов (77)
Огоҳлантиришлар: Баҳром Абдураҳимов 57.
"Динамо": 25.Муҳиддин Худоёров, 5.Илдар Маматказин, 7.Отабек Зокиров (26.Комил Шарофутдинов, 83), 13.Ҳасан Асқаров, 16.Акмал Холмуродов, 20.Фарруҳ Шотурсунов (95.Фирдавс Абдусалимов, 68), 55.Аваз Агалиев, 60.Дилшод Шарофетдинов, 61.Артём Филипосян, 66.Акмал Бозоров, 97.Камолиддин Мурзоев.
"Насаф": 30.Ўткир Юсупов, 4.Мақсуд Каримов (14.Шароф Муҳиддинов, 87), 6.Азиз Ғаниев, 9.Илҳом Шомуродов, 16.Алишер Юсупов, 17.Артур Геворкян(38.Дониёр Нарзуллаев, 75), 18.Баҳром Абдураҳимов (7.Акрам Баҳриддинов, 61), 22.Шоҳруҳ Гадоев, 28.Шуҳрат Муҳаммадиев, 34.Фаррух Сайфиев, 41.Азамат Алланиёзов.
Ҳакамлар: В. Серазетдинов (Тошкент), А. Усмонов (Тошкент), А. Цапенко (Тошкент вил.), А. Нажафалиев (Тошкент)
Назоратчи: А. Абдуллаев (Тошкент).