Испания чемпионатининг 10-тури доирасида "Реал" ўз майдонида "Лас-Пальмас"ни қабул қилди ва ўз ҳисобига навбатдаги 3 очкони ёзиб қўйди.

Ўйин дебютидаёқ меҳмон футболчиси қўпол хатога йўл қўйди. Иско эса бу хатони кечириб ўтирмади ва ҳисобни очди. Орадан 10 дақиқа ўтиб Марсело томонидан етказилган узатмани Роналду бош билан дарвозага жойлади.

Мазкур голлар амалда учрашув тақдирини ҳал қилди. Бўлим сўнгида томонлар бир мартадан дарвозаларни ишғол қилишди. Дастлаб бурчакдан етказилган узатмани Эрнан бош билан Кико Касилья дарвозасига йўллади. Хесе эса Крооснинг узатмасидан кейин тўпни жарима майдончаси ичида қабул қилди ва индивидуал маҳорати эвазига дарвозани ишғол қилди.

Иккинчи бўлимда томонлар бир мартадан хавфли вазиятларни яратишди. Аммо ҳар иккала вазиятда посбонлар ажойиб ўйин намойиш қилишди. Натижада баҳс сўнгида 3:1 ҳисоби порлади.

Ушбу ғалабадан кейин "Реал" ўз очколарини 24тага етказди ва пешқадамлик қилишда давом этади. "Барселона" тур баҳсини бугун Тошкент вақти билан 00:30да "Хетафе"га қарши ўтказади.

Ла лига, 10-тур
Реал Мадрид – Лас-Пальмас 3:1 (3:1, 0:0)
Голлар: 1:0 – 4 Иско, 2:0 – 14 Роналду, 2:1 – 38 Сантана, 3:1 – 43 Хесе.
Реал Мадрид – Касилья, Начо, Марсело, Данило, Варан, Каземиро, Модрич (Васкес, 46), Иско, Кроос (Майораль, 87), Хесе (Маркос Льоренте, 80), Роналду.
Лас-Пальмас – Варас, Гарридо, Бигас, Артилес, Симон, Сантана (Домингес, 64), Гомес, Меса, Эл-Жар (Алеман, 68), Виера, да Силва (Араухо, 80).
Огоҳлантиришлар: Сантана (30), Гомес (51), Артилес (90).