“Бунёдкор” – “Андижон” учрашуви қаҳрамонларидан бири Достонбек Ҳамдамов бўлди.

Достонбек Ҳамдамов захирадан майдонга тушишига қарамасдан “Андижон” жамоаси дарвозасига иккита тўп киритишга муваффақ бўлди. Унинг иккинчи голи “Бунёдкор”нинг олий лига доирасидаги 500-юбилей голи сифатида тарихда қолди. Учрашувдан кейин тарихий гол муаллифи Достонбек Ҳамдамовнинг фикрлари билан қизиқдик.

- Аввало, бугунги учрашувда эришилган ғалабадан хурсандман. Ўйиндан олдин “Бунёдкор”нинг олий лигадаги урган голлари 500тага яқинлашиб қолгани ҳақида ўқигандим. Бироқ майдонга тушаётганимда бу статистик маълумотни унутдим. Ўйин тугаб, кийим алмаштириш хонасига кирганимда 500-голни мен урганимни мураббийларимиз айтишди. Тарихий голни урганимдан бахтиёрман. Сўнгги учрашувларда асосан захирадан майдонга тушаётган бўлсам-да, мураббийларимиз ишончини оқлашга ҳаракат қиляпман. Мен майдонда қанча вақт тўп тепишимдан қатъи назар, гол уриб, жамоамга муваффақият келтиришни истайман. Ростини айтсам, йил бошида тўпурарлик ҳақида ўйлаган эдим. Лекин кўп гол уриш бўйича бошқалар етакчилик қилиб кетишди. Лекин ўзимнинг шахсий статистикамни яхшилаб боряпман. Ҳозирда клубимизда кўп гол уряпман. Насиб қилса, келаси йили тўпурарликка астойдил ҳаракат қиламан, - дейди Достонбек Ҳамдамов.