Хабар берганимиздек, бугун Олий Лига 29-тур учрашувлари доирасида “Локомотив” Муборакнинг “Машъал” клубини қабул қилди ва кичик ҳисобда зафар қучди.

Учрашув якунлангач ҳар икки жамоа устозлари иштирокида матбуот анжумани ташкил этилди. Унда дастлаб меҳмон жамоа устози Александр Хомяков қатнашди.

- Бугун биз ўз ўйинимизни намойиш эта олмадик. “Пахтакор”га қарши баҳсда анча куч сарфлаган эканмиз, шекилли, бу сафар ўйинимиз унча қовушмади. Айниқса, ҳужумда хавфли вазиятлар яратиш борасида оқсаш кузатилди.

Микита Букаткиннинг алмашитирилишини қандай изоҳлайман? У биринчидан бугун ўз позициясида ўйнамади. Бу унга бироз ноқулайлик туғдиргани тайин. Қолаверса, Микитанинг майдонда ўзини тутиши ҳам аламаштирилишга олиб келди. Зеро у бироз тажовузкор ўйнади, яна ҳакам билан тортишгани учун огоҳлантириш ҳам ишлаб олди. Шу жиҳатларни инобатга олиб, бу футболчини захирага олишга қарор қилдим.

Биз сўнгги икки турда икки пешқадамга қарши ўйин олиб бордик. Имкон қадар яхши натижа қайд этишни истагандик, аммо омад биз томонда бўлмади. Агар ушбу икки клубни таққослайдиган бўлсам, “Пахтакор”га қарши ўйнаш қийин ва қизиқроқ бўлганини таъкидлай оламан. Чунки “шерлар” анча тажовузкор ўйнашади ва рақибга ҳам ўйнаш имконини тақдим қилишади. “Локомотив” эса асосан тўп назоратига эътибор қаратади, - дейди тажрибали мураббий.