УЕФА раҳбарияти Европа чемпионлар лигасининг «Барселона» ва БАТЭ жамоалари учрашуви пайтида маҳаллий мухлисларнинг баъзи ҳаракатларидан норози бўлмоқда, дея хабар беради As нашри.
3:0 ҳисобида «Барселона» клуби фойдасига ҳал бўлган учрашув бошида Чемпионлар лигаси мадҳияси янграётган пайтда каталониялик мухлислар норозилик билдириб, ҳуштакбозлик қилишган. Учрашув давомида эса УЕФАни мафия ташкилоти эканини айтиб ҳайқириқлар амалга оширишган.
Юқорида номи келтирилган испан нашрининг ёзишича, УЕФА мазкур муносабат туфайли «Барселона» клубига интизомий чора кўриш бўйича иш очган.
Шунингдек, мухлислар стадионга Каталония мустақиллигининг рамзи бўлган бир неча мингта «Эстелада» байроқларини ҳилпиратиб туришган. Бироқ УЕФА бу борада Барселона клубини жазолашдан олдин Лозаннадаги спорт арбитраж суди (CAS) қарорини кутишни афзал билган.