Жароҳати туфайли Ўзбекистон миллий терма жамоасининг Жаҳон чемпионати-2018 иккинчи саралаш босқичи доирасидаги аввалги икки ўйинида иштироқ эта олмаган Александр Гейнрих жароҳатидан фориғ бўлиб, яна терма жамоа йиғинларига қўшилди. У билан бўлажак ўйин ҳақида қисқача суҳбат уюштирдик.
Миллий терма жамоа сафида 84 ўйинда майдонга тушиб, 29 голга муаллифлик қилган ҳужумчи бўлажак ўйин бу йилги энг муҳим учрашув эканини ва унда Ўзбекистонни фақат ғалаба қониқтиришини айтиб ўтди.
“Шуни айтиш мумкинки, ўйин қийин бўлади. Бу — ушбу йил давомидаги энг муҳим ўйин, деб айта оламан. Жамоага яқинда келиб қўшилдим. Аммо рақиб ҳақида ҳаммамизда етарлича маълумот бор. Бизга электрон почта орқали рақиб борасидаги керакли барча маълумотлар, видео-лавҳалар доимий равишда етказилиб турилди. Рақибнинг деярли барча футболчисини алоҳида ўрганиб чиқяпмиз. Яқинда уларни исмлари билан ҳам бемалол эслаб қоламиз, менимча. Уларнинг кучли ва ожиз томонларини ҳам билиб олганмиз. Нима бўлганда ҳам, ўз ўйинимизни ўйнашимиз ва керакли натижани қўлга киритишимиз керак. Бизни фақат ғалаба қониқтиради".
