Франция терма жамоаси ва "Атлетико" жамоаси ҳужумчиси Антуан Гризманнинг синглиси 13 ноябрь куни Париждаги "Батаклан" театрида жангарилар томонидан гаровга олинганлар орасида бўлган ва кейинчалик махсус хизматлар томонидан қутқариб олинган. Бу ҳақда футболчи ўз твиттерида маълум қилди.
"Худога шукрки, синглим у ердан омон чиқди. Қурбон бўлганларнинг яқинларига ҳамдардман", дея ёзган у.
Эслатиб ўтамиз, Парижда 13 ноябрь кечаси 6 тадан 7 тагача теракт амалга оширилган: 4 та ҳужумда одамларга қарата ўқ узилган, “Батаклан” концерт залида одамлар гаровга олинган, шаҳар четидаги “Стад де Франс” стадиони ёнида 3 та портлаш содир этилган.
Охирги маълумотларга кўра, теракт натижасида қурбон бўлганлар сони 150 кишини ташкил этади.
